📌 عندما وجدنا في الطب علقماً.. (أنا طالب طب… بنسى كتير وبزهج من الحاجة دي، نصيحتكم لي شنو؟)

جالينوس الطبي الصحة من لدن خبير 

📌 عندما وجدنا في الطب علقماً.. (أنا طالب طب… بنسى كتير وبزهج من الحاجة دي، نصيحتكم لي شنو؟)

✍️ بتصرف جالينوس الطبي 

🔳(أنا طالب طب… بنسى كتير وبزهج من الحاجة دي، نصيحتكم لي شنو؟) صدقني… ده واحد من أكتر الأسئلة البتجيني.

وأول حاجة داير أقولها ليك: إنت ما براك.

كلنا تقريباً مرينا بالمرحلة دي، وخصوصاً في الطب، لأن كمية المعلومات كبيرة جداً، ولو اعتمدت على الحفظ من أول مرة، غالباً حتنسى بسرعة.

أنا عن نفسي ما بعتمد على إني أحفظ من البداية، لكن بحاول أفهم الأول.. أقرأ أو أشوف الفيديو كأني بتفرج على فيلم، آخد الفكرة العامة، وبعدها أرجع للمادة مرة تانية وثالثة. مع كل مراجعة، المعلومة بتثبت أكتر.. وبرضو ما تكتفي بالقراءة فقط.

اسأل نفسك، حل MCQs، استخدم Anki أو أي طريقة للتكرار المتباعد (Spaced Repetition)، واشرح المعلومة بصوت عالي كأنك بتشرحها لزميلك. الحاجات دي بتثبت المعلومة أكتر من القراءة عشر مرات.وبرضو أوعك تستهين بالنوم.. ناس كتار بيفتكروا السهر هو سر النجاح، لكن الحقيقة إنو المخ أثناء النوم هو البيرتب المعلومات ويخزنها. بدون نوم كفاية، حتى لو قريت ساعات طويلة، حتلقى نفسك نسيت جزء كبير.. ولو بتتوتر في الامتحانات، حاول تحل أسئلة كتيرة قبل الامتحان بوقت كافي. كل سؤال بتحلو بيخلي مخك يتعود على استرجاع المعلومة، ولما تدخل الامتحان بتكون واثق أكتر.

وفي النهاية…ما تقيس نفسك بعدد المرات البتنسى فيها، لكن بعدد المرات البترجع فيها للمعلومة.. الطب ما محتاج ذاكرة خارقة… محتاج صبر، واستمرارية، وطريقة مذاكرة ذكية.. وربنا ما بضيع تعب زول اجتهد وأخذ بالأسباب.. سؤال ليكم: شنو أكتر مادة بتحسوا إنكم بتنسوا معلوماتها بسرعة؟ الفارما؟ الأناتومي؟ الباثولوجي؟ خلونا نتبادل الطرق البتساعدنا كلنا.