♨️ مقال

📌مبارك جعفر يكتب : يا شبابنا في أحمد قاسم

✍️ مبارك جعفر

◼️شبابنا في مستشفى أحمد قاسم للأطفال

الأيام دي هي أيامكم لتنفيذ كل طلباتكم اللي بتحفظ ليكم حقوقكم

وأي تأخير في التنفيذ ما حيكون لصالحكم

اضرب الحديد وهو سخن

◼️المطالب واضحة، صاح؟

1. الفصل الإداري والواقعي، ما بين مستشفى الأطفال ومستشفى القلب، حتى الباب البتدخلوا منه يكون مختلف، زي ما قال دكتورنا الإدريسي، عشان ينتهي وللأبد حلم لوبي الصحة “اللص” في الدمج وإلغاء قسم الأطفال

2. تثبيت حقوق وأصول مستشفى الأطفال، بتكوين لجنة، وبأي إشرافٍ ترونه، لحصر كل ممتلكات مستشفى الأطفال، “وتحريرها كتاااابة” لمنع التعدي عليها مستقبلا.

وتكون معاكم لجنة قانونية، أو مجلس أمناء المستشفى

والشعب كله معاكم

3. وللتأكيد، الترتيبات تتم “فورًا” لفصل مستشفى الأطفال عن القلب، وحنك ناكل من صحن واحد براكم عرفته نهايته شنو

◼️وبقية المطالب انتو أعلم بيها، ونثق فيكم ❤️

هسي انتو معاكم الشعب، والوالي زاتو معاكم وبإشراف مباشر منه، وعينه على القضية. بوضوح كدا؛ لوبي الصحة – الخرطوم “اللص” ح ينحني للعاصفة هسي، لأنها أقوى منه :)

ودي ياها فرصتنا لتثبيت الحقوق وحماية أطفالنا منهم

وأي تصريح أو قرار أو تلميح يجي من اللوبي؛ بس كلمونا :)

◼️أظن بالطريقة دي نكون خلاص ماشين نقفّل القضية دي ونطمن عليكم يااااا جيشنا الأبيض، ونشوف موضوع تاني

اطمنا انو مستشفى أحمد قاسم للأطفال حيظل شامخ، ومستقل

وبكدا، نكون كلنا وقفنا مع بعض ضد لوبي الصحة

أطباء – مواطنين – مهنيين – بل وحتى الوالي

ياخ حتى أسرة أحمد قاسم، أبناؤه وأحفاده، بيشكروكم!

كلنا على قلب رجل واحد، معكم

◼️ودا نموذج، يا أحبة، لكيف المجتمع بيدافع عن حقه

وكيف انك تتكلم عن قضيتك، وبعزة وراس مرفوع

بعيدا عن عقلية التشكّي وشخصنة الاتهامات

عندنا وطن، مهمتنا نبنيه بدون مفسدين أو انتهازيين :)

فأرجوكم، الحديد وهو سخن 🔥

◼️د. محمد عوض الكريم الادريسي : شكر الله سعيك

ود. يس الأمير، أعانك الله على ما أنت مكلف به

ودا كله ليه؟

لأن السوداني ليس له أن يعيش في أرضه إلا بعزة وكرامة