♨️ مقال
📌د محمد هيكل يكتب : مصيبة كل فحوصاتك ( نضيفة)
✍️ د. محمد هيكل
◼️جالي مريض في التلاتينات من عمره بيشتكي من شكوى غريبة جداً بس الحقيقة وصفها بشكل عبقري عجبني لأقصى درجة و أثار جوايا حفيظة البحث و التنقيب عن الوصف العلمي لشكوته.
◼️المريض شكوته عبارة عن ٣ كلمات : (( أنا بحس بجسمي))
طلبت منه يشرح لي أكتر يعني إيه بتحس بجسمك ؟؟
◼️قال لي :-
• يعني بحس بخبط قلبي في صدري.
• يعني بحس بحركة الرئتين جوة القفص الصدري و أنا بتنفس.
• يعني بحس بحركة الدم جوة عروقي.
• يعني بحس بحركة معدتي و أمعائي جوة بطني.
• يعني بحس بكهربة الإشارات العصبية في ايدي و رجلي.
• يعني بحس بشدة عضلات جسمي كله.
◼️بصراحة وصف الشكوى شدني و خلاني أفكر و أبحث و أرجع تاني لكتب علم الفسيولوجي و المخ و الأعصاب.
قرأت معلومات في غاية الأهمية و الخطورة و التعقيد بس هحاول أبسطها لكم بقدر الإمكان ..
◼️الخالق – سبحانه و تعالى- خلق أعضاء جسمنا المختلفة عبارة عن سلسة مصانع جنب بعضها أو منطقة صناعية شديدة التعقيد لا تتوقف عن العمل ليل نهار.
◼️كل مصنع من المصانع دي أثناء عمله بيعمل ضوضاء و ضجيج مزعج لو كل واحد فينا حس بيه مش هيعرف لا ينام و لا يرتاح و لا يشوف شغله و يمكن يتجنن و يفقد عقله.
◼️و عشان كده ربنا – سبحانه و تعالى – خالق في جهازنا العصبي حاجة زي الفلتر و ظيفتها الأساسية منع وصول الإشارات الحسية من أعضاء الجسم المختلفة طول ما هي شغالة بشكل طبيعي.
◼️الفلتر الموجود في جهازنا العصبي ده بيخلي كل المصانع اللي جوة جسمنا دي شغالة طول الـ ٢٤ ساعة من غير ما نحس بيها إطلاقاً.
◼️أومال إمتى نبدأ نشعر و نحس بالمصانع دي ؟
في حالتين :-
١- لو حدث تغير أو خلل في أداء أحد الأعضاء لوظيفته .. زي مثلاً إن ضربات القلب بقت أسرع أو أبطء من المعدلات الطبيعية المعتادة أو حصل عدم انتظام و خلل في الإيقاع القلبي .. في الحالة دي يبدأ الشخص يشعر بضربات قلبه بتخبط في صدره و يحس بعدم الارتياح اللي ممكن يوصل للذعر و الهلع.
أو زي مثلاً لو الشخص حصل له التهاب في المعدة أو الأمعاء فيبدأ يحس بحموضة العصارات الهاضمة و حركة الأمعاء و المعدة و تقلصات شديدة داخل البطن.
٢- لو حصل خلل في فلتر الجهاز العصبي المسئول عن منع وصول الإشارات الحسية من أجهزة و أعضاء الجسم المختلفة إلى مراكز الإدراك في المخ .. في الحالة دي الشخص بيشعر بكل شيء بيحصل في جسمه حتى لو كل وظائف جسمه سليمة ١٠٠٪
◼️الشخص السليم لو جرب كده يحط ايده على قلبه أو على نبض شريان الرسغ .. هيحس نبض القلب و الشريان في أطراف صوابعه رغم إنه مش حاسس النبضة دي في صدره و لا حاسس نبض الشريان في الرسغ.
◼️الشخص السليم مستحيل يشعر حركة و صوت الأمعاء جوة بطنه رغم إنه لو حط السماعة الطبية على بطنه و سمع حركة بطنه هيستغرب إزاي مش حاسس و لا سامع كل ده.
◼️الشخص الطبيعي مش بيحس بعضلات جسمه مشدودة رغم إنها مشدودة بدرجة معينة عشان تحافظ على شكل الجسم و استقامة العمود الفقري و حركة المفاصل بسلاسة.
◼️بمجرد ما الفلتر العصبي ده يحصل فيه خلل ؛ المخ بيتسرب له ملايين و ربما عشرات الملايين من الإشارات العصبية من أعضاء الجسم المختلفة اللي ما كانش حاسس بيها و لا واخد باله منها أصلاً.
◼️و لذلك المريض ده دايما ً مشوش التفكير .. شارد الذهن .. كثير النسيان .. شبه منفصل عن الحياة و الواقع لان مخه مستهلك و منهمك على مدار الوقت في استقبال إشارات عصبية من أجهزة جسمه المختلفة بتخلي دايماً مخه مشتت عن استقبال الإشارات العصبية من البيئة المحيطة به و الأشخاص اللي بيتعاملوا معاه ؛ و بالتالي يبدأ في الانعزال عن الحياة و العمل و الأسرة و يتقوقع داخل نفسه لان جهازه العصبي منهك دايماً لدرجة إنه أصبح غير قادر على استيعاب أي مؤثرات خارج جسمه.
◼️و هو ده اللي بيحصل بالظبط في مرضى اضطرابات العصب الحائر و الجهاز العصبي اللاإرادي؛ خلل أو فجوات وظيفية (Gaps) في جهاز الإلغاء الشعوري (الفلتر العصبي) يؤدي إلى إحساس مفرط بكل ما يدور في الجسم من وظائف طبيعية زي النبض و التنفس و حركة الأمعاء داخل البطن و شد العضلات ؛ و كلها أحاسيس يستحيل ترجمتها إلى تغيرات تظهر في الاشاعات أو التحاليل أو المناظير.
◼️و عشان كده المريض ده بعد كل زيارة لكل طبيب في جميع فروع الطب على مدى سنوات طويلة الزيارة بتنتهي دايماً بابتسامه عريضة من الطبيب يليها عبارة ( كل فحوصاتك سليمة .. إنت ما عندكش حاجة .. روح اكشف أمراض نفسية)
◼️المريض بيكون عايش لسنوات في معاناة لا يعلم مداها إلا الله و مع ذلك دايماً يقول ( ماحدش فاهمني .. ماحدش قادر يستوعب شكوتي .. أقسم بالله أنا مش مريض نفسي)
◼️و أحيانا ً بيوصل الأمر إلى نوايا حقيقية في أن ينهي المريض حياته بنفسه .. ده طبعا ً بعد ما يكون المريض خد لفة حلوة عند الدجالين و المشعوذين بعد ما تأكد من عجز الطب عن الوصول لمشكلته أو حتى يلاقي حد يفهم شكوته.
◼️اختبارات العصب الحائر زي الهولتر و المنضدة المائلة بتدي صورة جزئية عن دور اضطرابات العصب الحائر ( اللي هو جزء من الجهاز العصبي اللاإرادي) في حدوث خلل في نبض القلب و ضغط الدم ؛ و من كده بنقدر نستنتج وجود خلل عام في وظائف الجهاز العصبي اللاإرادي المتحكم في أجزاء أخرى من الجسم لا يتم تنظيم وظائفها من خلال العصب الحائر لوحده.
◼️العلاج مش زي ما كنا فاكرين زمان هو ١٠ نقط ميدودرين على نص كوباية ماية لو حصل هبوط أو الضغط وطي و لا هو قرص الاندرال ١٠ صبح و ليل لمدة أسبوعين و هتبقى زي الفل.
◼️العلاج في غاية الصعوبة و التعقيد و يعتمد على إعادة ترميم الفجوات الوظيفية في جهاز الإلغاء الشعوري ( الفلتر العصبي) من خلال تحسين وظائف النواقل الكيميائية العصبية في الجهاز العصبي زي الاسيتيل كولين و السيروتونين و الدوبامين و النورأدرينالين عشان نقدر نعزل المخ عن استقبال وابل الاشارات العصبية اللي المفروض في الطبيعي ما توصلوش و لا يحس بيها و بالتالي يتفرغ لاستقبال الإشارات العصبية من أجهزة الجسم فقط في حالة وجود خلل فيها و يتفرغ أيضاً للتعامل و التفاعل مع المؤثرات الخارجية في البيئة المحيطة به.
◼️أنا عارف إن الموضوع معقد و صعب بس أرجو أكون وصلت لكم المعلومة بشكل بسيط
