📌استراحة الجمعة //د. توسل أحمد تكتب : في إمتحان الزمالة الكندية.. تخيلو اللوبيا طلعت (Superfood).. والله كلام يا اللوبيا

جالينوس الطبي الصحة من لدن خبير

📌استراحة الجمعة //د. توسل أحمد تكتب : في إمتحان الزمالة الكندية.. تخيلو اللوبيا طلعت (Superfood).. والله كلام يا اللوبيا.

 ✍️ د. توسل أحمد 

🔳بعد أيام قليلة حاندخل إمتحان الزمالة الكندية.. نحن ١٢ راجسترار ومشرف علينا مستر نرويجي الجنسية…. بيركز دائما على تغذيتنا شديد… بس ملاحظين حريص جدا وجبته يكون فيها لوبيا وطبعاً هنا غالية ما زي السودان رخيصة ومافي زول مديها قيمته.. الليلة في الفطور قال لينا بما إنكم حاتكونو مناوبين و شغالين مذاكرة… جايب ليكم وجبة Superfood تدعم ادمغتكم قبل أجسادكم… شالنا الحماس طلعنا صالة Breakfast طوالي منتظرين الاكل يجي

🔳… إذا بها يجيبو لينا لوبيا🙂💔… يا دكتور وين Superfood دي لوبيا وانا كسودانية بالنسبة لي Badfood ماعايزاها وكن للبروتين الفيها بنزل بوفي المستشفي أكل فراخ احسن لي…. وحصل فعلا خليتهم ياكلوا لوبيتهم ومشيت اكلته فراخ وجيت… اول ما جيت المستر اداني محاضرة كاملة جدا في دراسات وابحات اتعملت في اللوبيا وعن قيمته الغذائية الطلعت بتفوت ملايين المرات فكرتي الغذائية المحدودة إتجاها و المحصورة في البروتين، الفسفور، الزنك.. طلعت هاااائلة وفعلا Superfood

🔳وبجد نحن كسودانيين عندنا ثروة ثررررروة ونحن ما مركزين عليها بلدنا بتنتج غير اللوبيا دي ألف Superfood بس نحن نظرتنا محصورة مابين اللحوم البيضاء والحمراء والقليل من الفواكه.

🔳حأعمل ليكم بوست كامل عن اللوبيا والدراسات الإتعملت فيها و فوائده وإن شاء الله حايكون صحن اللوبيا حاضر يومياً في صينيتكم🌿