♨️ مقال 

📌 مبارك جعفر يكتب : فضيحة الدكتور

( السوبرمان)  بصحة ولاية الخرطوم 

✍️ مبارك جعفر 

◼️د. أحمد البشير، مدير الطب العلاجي في وزارة الصحة – الخرطوم

تحية وطيبة، وبعد

بما إنك الفترة الفاتت فصلت كمية مدراء (لعدم الكفاءة)، وعيّنت مكانهم كمية مدراء، وحنفترض لهمك الشديد على صحة المواطن وكدا، ولتطبيق القوانين، بعيدا عن (الصراعات الحزبية)، فعندي استفسارات بسيطة شديد ممكن ترد عليها، بما إنك لسة في المنصب، نيابة عن د. فتح الرحمن “المقال”، الما حنقدر نسأله

◼️وكلامنا حيكون مرتكز على مستندين

1. القانون الإطاري للخدمة المدنية القومية لسنة 2018

2. قانون المفوضية القومية لمكافحة الفساد 2020

حلوين؟

◼️د. محمد سعيد محمود حسنين، الظاهر معاك في الصورة، والمدير في وزارة الصحة بولاية الخرطوم

ربنا يحفظه ويرعاه، ويمكن هو زاتو هسي بيقرا في كلامي

عنده تلات وظائف:

1. مدير إدارة التنمية والمشروعات في وزارة الصحة – ولاية الخرطوم

2. المدير العام لمستشفى إبراهيم مالك

3. المدير العام لمستشفى التميز

◼️أسئلتي ليها جانبين، وبكل تجرد، بدون شخصنة مواضيع وحساسية زايدة

جانب كفاءة، وجانب قانوني وتشريعي

◼️بالنسبة للكفاءة: 

هل إنت شايف إنو زول يكون مدير إدارة التنمية والمشروعات في وزارة الصحة، يكون معاه وظيفة تانية ومدير عام كمان لمستشفى كبير زي إبراهيم مالك؟ وكمان مدير عام لمستشفى التميز؟

تلات وظائف متوقع يكون فيها كفاءة مثلا؟ ما عصرت عليه؟ ما عصرت علينا نحن زاتنا؟

دا بالنسبة لجانب الكفاءة

◼️نجي للجانب القانوني

لو رجعنا لنصوص القانون الإطاري للخدمة المدنية القومية لسنة 2018، وبنوده

المادة (23): الأجور والامتيازات العينية والمخصصات الوظيفية المرتبطة بالوظيفة في المستوى المعين بالوحـدة لا يتقاضاها إلا من استوفى شروط شغلها و يقوم فعلاً بمباشرة واجباتها ومسئولياتها

◼️فهل الدكتور شغال (تطوعا) في كلا المستشفيين، وموظف رسمي في وزارة الصحة – الخرطوم؟

لأنه لو كان الجواب لا، وبيتقاضى مخصصات، معناها دي المصيبة زاااتا

ولو كان أيوة تطوع منه، لشنو طيب الفوضى دي كلها، البلد دي ما فيها كفاءات يعني تمسك؟ ريحوا الزول شوية!

◼️المادة (24) من القانون: عدم الجمع بين وظيفتين: 

(1) لا يجوز الجمع بين وظيفتين في الدولة

(2) لا يجوز لأي من العاملين الجمع بين أكثر من شروط خدمة واحدة

◼️الدكتور ده كدا ما أخل بالقانون؟ (حتى لو كانت نيته طيبة وعاوز يساعد كل مستشفيات السودان)

ياخ دا جامع بين تلات وظائف (كبرى) عديل!!

دا ما ممكن نسميه احتكار المناصب القيادية وحرمان الكفاءات الأخرى منها؟

دا ما يندرج تحت إساءة استغلال السلطة في التعيينات؟

◼️أما بالنسبة للأخيرة، قانون المفوضية القومية لمكافحة الفساد 2020

البند: المادة (3) (تفسير الفساد) والمادة (38) (الإفصاح وتعارض المصالح).

النص: يُعرّف الفساد بأنه “استغلال النفوذ أو الموقع الوظيفي لتحقيق منفعة أو مصلحة خاصة أو لغيره”. كما يلزم القانون المسؤولين بـ “التنحي عن أي إجراء يتخذ بشأن موضوع يكون له فيه مصلحة”.

الحاصل ده ما بيخلق لينا (تضارب مصالح) عديييل وبالدرب؟

ما بيخلق نوافذ “فساد” ممكنة وساااااهلة كمان؟

◼️شغل منصب بوزارة الصحة (جهة رقابية وتخطيطية) مع منصب مدير عام مستشفى (جهة تنفيذية) بيخلق حالة تضارب مصالح، إنت خليت الشخص هو “المراقب” وهو “المنفذ” في وقت واحد، قتلت أم الشفافية وفتحت باب الفساد الإداري!

كفاك وللا أزيدك؟

جبتها ليك من ناحية منطق سااااي، كيف زول يشتغل في تلات وظائف كبرى في وقت واحد

وجبتها ليك من ناحية قانون، كان خدمة مدنية، كان مكافحة فساد

شنو الإجراء اللي حتتخذه يا د. أحمد البشير في الحالة دي؟ 

أو، مشورتك للوزير الجاي كيف يتصرف مع الحالة دي

أو الوزير الجاي براهو يجاوب، لو ما قدرت يعني

◼️وطبعا لو كانت في جهة مساءلة، الدكتور دا كان حيضيع فيها، قطع شك، ووصلت المحاكم زاتو ) 

بس ياهو، ما عندنا غير الشفافية دي 

خلوه في وظيفة وااااحدة يركز عليها، بدل الاحتكار والضغطة الحاصلة دي، وشبهات ما ياها ممكن تظهر) 

في النهاية نحن بنفترض حسن النية في الكل، خلوه يركز) 

◼️وليه كل التساؤلات دي؟

لأننا مهتمين إنو أي موظف في الخدمة المدنية، يكون قادر يقدم الخدمة المطلوبة منه للمواطن، وبكفاءة كمان :) 

 لأن السوداني، ليس له أن يعيش في أرضه إلا بعزة وكرامة