📌 عبدالرحمن تمريض يكتب : انتهى كأس العالم.. ناس (البواسير الهاجت) هاكم القواعد(ال8) الذهبية حقتها

جالينوس الطبي الصحة من لدن خبير 

📌 عبدالرحمن تمريض يكتب : انتهى كأس العالم.. ناس (البواسير الهاجت) هاكم القواعد(ال8) الذهبية حقتها. 

✍️ عبدالرحمن تمريض 

🚨 الليلة ح نتكلم عن موضوع حساس ومحرج شوية لكن حاصل في بيوتنا أكتر مما متخيلين.. موضوع بيحصل لعدد كبير من الناس وممكن يحصل معاك أو مع زول من أهلك في أي وقت.. الكلام عن البواسير

📌 البواسير هي شنو؟  هي انتفاخ والتهاب في الأوردة الموجودة داخل أو حول فتحة الشرج الأعراض ألم، حكة، نزيف مع البراز، إحساس بكتلة، أو إحساس إنو الحمام ما تم للنهاية🚾

🔹طيب اسبابها شنو اساسا 🥲

1. من اول الاسباب الاكل بتاعك يااا استاذ 🙂 حتقول لي الاكل علاقتو شنو بالبواسير 😒، كونك تاكل اكل كلو ناشف و عيش ابيض دهون و ما بتشرب كميه كافيه من السوائل دا ح يجيب ليك اول شي الامساك و الامساك هو بي دورو بعمل البواسير بسبب انو لما تمشي الحمام تقضي حاجتك ح تضغط علي بطنك و الضغط د بعمل تمدد في الاورده الموجوده في المنطقه دي و بتنتفخ و بتتكون البواسير😤

2. الحاجه التانيه القعاد لفترات طويلة  

    خاصة في الحمام والتلفون في يدك، أو الجلوس في المكتب والسواقة لساعات او حتى الكلبه للقرايه و في المكاتب و القاعات . الضغط المستمر بيحبس الدم في الأوردة دي و بيحصل تمدد و انتفاخ بعد مده 

3. قلة شرب الموية   الموية هي البتلين البراز. لو شربك بسيط البراز بنشف وبجرح مع الطلوع.

4. الأكل القليل بالألياف     زي الاعتماد على العيش الأبيض، الدهون، الوجبات السريعة ونسيان الخضار والفواكه والحبوب الكاملة.

5. وبرضو لو بتشيل اوزان تقيله 🏋️  

    الشيل المتكرر والغلط بيرفع الضغط جوه البطن كلو وبينزل على الأوردة دي.

6. السمنة وزيادة الوزن

الوزن الزايد = ضغط زيادة على منطقة الحوض والأوردة زي كانك شايل وزن برضو تقيل

7. الحمل عند النساء    ضغط الجنين + التغيرات الهرمونية + الإمساك المصاحب للحمل كلها عوامل بتودي للنهايه للبواسير

8. الإسهال المزمن

برضو بعمل تهيج والتهاب مستمر للمنطقة

🧑‍⚕️كيف نتجنبها؟ 8 قواعد ذهبية

1. الموية خط أحمر

اشرب 8-12 كباية موية في اليوم. الموية + الألياف = براز لين وما في ضغط علي البطن في الحمام ✅

2. دخل الألياف في كل وجبة

خضار، فواكه بقشرها، شوفان، عدس، عيش بلدي، لو بطنك ما متعودة دخلها تدريجي.

3. أمشي الحمام أول ما تحس    مقاومة المشي للحمام بتخلي الجسم يمتص الموية من البراز ويبقى ناشف وحجر. وما تقعد تتصفح جوه الحمام😐

4. الحركة نص العلاج    حتى لو نص ساعة مشي في اليوم. الجلوس الطويل بيقتل و بعمل ضغط علي الاورده و بعمل امساك . كل ساعة قوم اتحرك 5 دقايق ان شاءالله

5. لو جاتك البواسير ممكن تقعد في موية دافية

بعد الحمام أو مرتين في اليوم. موية دافية في جردل 10 دقايق بتريح الالتهاب والتشنج راحة عجيبة

6. حافظ على وزن صحي

كل ما الوزن زاد الضغط على الأوردة بزيد

7. طريقة الشيل الصح

لو مضطر تشيل تقيل، اتني ركبك وارفع بكراعك ما بضهرك

8. ابعد من الصابون المعطر والمناديل الناشفة

استخدم موية أو مناديل مبللة بدون كحول عشان ما تزيد الالتهاب والحكة

🚨 لو حصل ليك واحد من الحاجات التحت دي

– نزيف متكرر مع البراز

– ألم شديد ما بستحمل

– ظهرت كتلة كبيرة وما راضية تدخل

– حكة شديدة ما بتقيف

ما تعتمد على العلاجات الشعبية و امشي للدكتور وما تتأخر في الكشف. في علاجات ومراهم وفي حالات بسيطة بتتحل بدون جراحة.

✅البواسير ما عيب ولا مرض خطير. الوقاية منها في يدك: موية + ألياف + حركة + ما تضغط علي بطنك جوه الحمام