📌عبدالرحمن تمريض يكتب : يادكتور أقفل الستارة بين السراير. لو مافي ستارة، اطلب ملاية.. لازم نحترم خصوصية المريض.

جالينوس الطبي الصحة من لدن خبير

📌عبدالرحمن تمريض يكتب : يادكتور أقفل الستارة بين السراير. لو مافي ستارة، اطلب ملاية.. لازم نحترم خصوصية المريض. 

✍️ عبدالرحمن تمريض

🔳يا جماعة العيان دا بني آدم.. عندو كرامة وإحساس وأهل ما حالة ولا سرير رقم 5

الخصوصية الجسدية دي خط أحمر⛔ ما مجاملة مننا، دا حقو علينا ككادر طبي.🧑‍⚕️

تتعامل مع جسم العيان كالاتي ؛

1. نكشف الحتة الدايرينها بس
عايز تسمع الصدر؟ ما تقلع الزول الفنيلة كلها. ارفعها شوية بس.
عايز تفحص البطن؟ اكشف البطن بس، ما تخلي الزول كلو فاتح تغطي رجولو و صدرو
السترة واجب.. حتى لو العيان في غيبوبة، لأنو دي أمانة🤕.

2. الباب يتقفل، والستارة تنزل 🚪
مافي حاجة اسمها كشف في الممر، ولا في العنبر قدام 8 عيانين ومرافقينهم حتي لو كانو من نفس جنسهم اذا رجال او نساء 🙅
العيان دا ما معرض.. لو مافي غرفة فحص، أقفل الستارة بين السراير. لو مافي ستارة، اطلب ملاية.
كرامة الزول دا أهم من الزمن وانك تخلص سرعه😐

3. يشوفو المكان ناس الشغل بس
المكان الحنكشفو دا يشوفوه الناس الحيعملو الإجراء بس.
ما يدخل طالب، ولا عامل نظافة، ولا زول ساي عايز يتفرج.
ولو لازم طلبة يحضرو، تستأذن العيان أول: بعد إذنك يا حاج، ممكن الطلبة يحضرو؟ لو قال لا، خلاص.. حقو.

4. الكشف للضرورة بس
ما أي زول خاشي العنبر يجي يرفع البطانية نشوف الجرح كيف. ❌
كل كشفة بحسابها، وبسبب طبي واضح. ما عشان الفضول ولا نوري الدكتور الجديد.

5. الممرات ما محل كشف
العيان ماشي الأشعة بقميص العمليات المفتوح من ورا؟ غطوه بملاية يا ناس.
ما ممكن لافي بيه من الطابق التاني للبدروم وهو حالتو بالبلا.
الناس في الممرات ما ذنبها تشوف، وهو ما ذنبو يتحرج.

احترم خصوصية العيان = احترمت كرامتو = احترمت مهنتك.

العيان دا جانا تعبان ومكسور.. ما نكسر كرامتو فوق مرضه.
الطب أخلاق قبل ما يكون شهادات