♨️ تثقيف صحي
📌 د. أحمد عدلان يكتب :
سر طب العواسة وشيل الحلل.
✍️ د أحمد عدلان
💢 كثير مننا بيقيف مذهول قدام امو وهي بتقلب الكسرة في الصاج الحار بيديها، أو بتشيل حلة الملاح من النار وكأنها شايلة كباية موية باردة.
☘️ عمرك سألت نفسك ليه امي ربنا يحفظها بتقدر تهبش الجمر، وتقلب طرقة الكسرة في الصاج المولع، وتشيل الحلة من الكانون بيديها العارية، وأنت لو هبشت طرف الصاج بتجري على الماسورة تبرد يدك؟
الموضوع ده ما صدفة، ولا بس “تعود” بالمعنى البسيط.
☘️العلم والطب والدراسات الفسيولوجية عندهم تفسير دقيق للحالة دي، وبقولوا ليك إن يد الأم وكل الأمهات الشقيانات بتمر بعملية تحول بيولوجي حقيقية.
▪️١/ظاهرة (Hyperkeratosis):
في علم الجلدية (Dermatology)، الجلد بتاعنا بيتكون من طبقات، الطبقة الخارجية اسمها “الطبقة المتقرنة” (Stratum Corneum).
الدراسات بتأكد إن التعرض المستمر والمزمن للاحتكاك والحرارة (زي العواسة وشيل الحلل) بيخلي الخلايا الكيراتينية (Keratinocytes) تزيد إنتاج بروتين “الكيراتين”.
علشان كدا جلد يد الأم بيبقى أسمك بكتير من جلدك الناعم. الطبقة دي بتشتغل كـ “عازل حراري” (Thermal Insulator). يعني الحرارة بتاخد وقت أطول عشان تخترق الجلد الميت وتصل للأعصاب الحية تحت.
وفي كتاب Rook’s Textbook of Dermatology
– بيشرح كيف الجلد بيبني دفاعاته ضد المؤثرات الخارجية.
▪️٢/ تكيف المستقبلات العصبية (Neural Adaptation):
في يدك في مستقبلات ألم وحرارة اسمها (Nociceptors).
عند الأم، المستقبلات دي حصل ليها حاجة اسمها “Habituation” أو تعود.
دراسات الألم (Pain Science) بتقول إن التعرض المتكرر لمحفز (زي الحرارة) دون الوصول لدرجة الحرق المدمر، بيخلي الجهاز العصبي يرفع “عتبة الألم” (Pain Threshold).
يعني الدرجة البتخليك إنت تصرخ وتقول “واااي”، عند الوالدة بتكون مجرد حاجة “دافية”.
ودي دراسات International Association for the Study of Pain (IASP) حول تكيف الأعصاب الطرفية.
▪️٣/ فيزياء التوصيل الحراري (Thermal Conductivity):
الجلد الخشن والجاف (Callused skin) توصيله للحرارة أبطأ بكتير من الجلد الرطب أو الناعم.
لما الأم تمسك الحلة بسرعة، الحرارة ما بتلحق تنتقل للأنسجة العميقة بنفس السرعة البتحصل معاك.
ده بيعتمد على مبدأ فيزيائي ودراسات حول الخصائص الحرارية للأنسجة البشرية.
▪️٤/ الذاكرة العضلية والتقنية (Motor Control):
دراسات الحركة (Kinesiology) بتوضح إن “الحرفيين” بصورة عامة والأم تعتبر حرفية درجة أولى، عندهم دقة عالية في لمس الأشياء.
▪️هي بتعرف فطرياً تمسك الحلة من وين (أماكن أقل سخونة) والزمن اللازم للمسة (Contact time) بيكون محسوب بالملي ثانية عشان ما تتحرق، حركة إنت ما بتلاحظها بعينك لكن مخها مبرمج عليها.
◼️ربنا يحفظ كل امهاتنا واخواتنا ويرحم المتوفين يارب العالمين
