د. أحمد عدلان يكتب : حالة مرضية جاتنا في الحوادث والطوارئ علمتني درس ما بنساه طيلة حياتي!!

جالينوس الطبي الصحة من لدن خبير 

📌د. أحمد عدلان يكتب : حالة مرضية جاتنا في الحوادث والطوارئ علمتني درس ما بنساه طيلة حياتي!! 

✍️ د. أحمد عدلان 

⚫كانت مناوبة طوارئ عادية… لكن الحالة دي علمتني درس ما بنساه.

🔳دخل علينا شاب في بداية العشرينات، وماسك جنبو اليمين، واضح من وشو إنو الألم شديد… قلت ليه:”الألم بدأ متين؟”قال:”قبل حوالي ست ساعات.”سألته عن الاستفراغ…قال: “ما حصل.”عن الحمى…قال: “ما عندي.”

🔳كشفنا عليه، وكان الألم مركز في أسفل البطن من الناحية اليمين، المكان البنعرفو في الطب باسم Right Iliac Fossa (RIF)، وهو المكان المشهور بألم الزائدة الدودية.

🔳لكن ما كان عندو Rebound Tenderness (ألم شديد عند رفع اليد بعد الضغط)، ولا Guarding (تشنج عضلات البطن)، وهي علامات بتظهر في الحالات المتقدمة.

🔳أول ما خلصنا الكشف…سمعت نفس الجملة من أكتر من دكتور:”دي زايدة… جهزوه للجراحة.”الحقيقة…أنا كمان فكرت في الزائدة أول لحظة.

🔳لكن كانت في حاجة صغيرة، بسيطة جدًا، ما خلتني أقتنع.. سألته سؤال يمكن ناس كتار يشوفوه عادي:”آخر مرة أكلت متين؟ وشهيتك كيف؟”

🔳ابتسم وقال:”قبل شوية… أكلت سندوتشين طعمية وشربت شاي.”

⚫هنا وقفت…وقلت في نفسي:”لا… في حاجة ما راكبة راسي”.لأنو في التهاب الزائدة الدودية الحقيقي، من أوائل الأعراض البتظهر فقدان الشهية (Anorexia).

🔳المريض غالبًا ما بكون عندو رغبة في الأكل، حتى لو ما اشتكى من الألم بصورة كبيرة.

🔳وعشان كده، فقدان الشهية داخل ضمن Alvarado Score، وهو أشهر نظام بنستخدمو لتقييم احتمال التهاب الزائدة الدودية… وغياب العرض ده ما بنفي التشخيص نهائيًا…لكن بخليك توقف وتفكر مرة تانية قبل ما ترسل المريض لغرفة العمليات.

🔳وتذكرت وقتها عبارة جميلة للجراح الأمريكي John Hunter:«”In appendicitis, the appetite dies before the patient even complains.”»”في التهاب الزائدة… الشهية بتموت قبل ما المريض يشتكي من الألم.”

🔳وكمان في دراسة منشورة في British Medical Journal (BMJ) ذكرت إن فقدان الشهية موجود في نسبة كبيرة من مرضى الزائدة، وغيابه يستحق إعادة التفكير في التشخيص.. قلت للزملاء:”يا جماعة… قبل الجراحة، خلونا نعمل موجات صوتية (Ultrasound).”

🔳في البداية كان في تردد…لكن في النهاية وافقوا.وبعد دقائق…ظهرت النتيجة.الزايدة كانت طبيعية.لكن في المقابل…كانت الغدد الليمفاوية داخل البطن متضخمة.التشخيص كان:

Mesenteric Adenitis أو بما يسمى بالتهاب الغدد الليمفاوية .

🔳وده مرض شائع، خاصة عند الشباب والأطفال، وبيعمل ألم شديد في نفس مكان الزائدة تقريبًا، لذلك مرات بخدع حتى الأطباء.وبكون الشخص قبليه كان عنده التهاب فيروسي في الصدر او الحلق لكن غالبًا العلاج بيكون علاجه تحفظي، وما بحتاج عملية.

🔳في اللحظة دي تذكرت مقولة الجراح البريطاني

 Sir Zachary Cope، صاحب كتاب

 Early Diagnosis of the Acute Abdomen:

«”Not all that hurts in the right iliac fossa is appendicitis. Beware the imitators.”»

“ليس كل ألم في الجهة اليمنى السفلية من البطن يعني التهاب الزائدة… احذر الأمراض التي تقلدها.”الحمد لله…

🔳المريض أخذ مسكنات، وسوائل، وارتاح تدريجيا. وخرج من المستشفى بدون عملية…وربما بدون ندبة كانت ممكن تلازمه طول عمره.

📚 الدرس الاتعلمته انا من الحالة دي:في الطب..التشخيص ما بيبدأ بالأشعة…ولا بالتحاليل…التشخيص الحقيقي بيبدأ من القصة المرضية ومن التاريخ المرضي، ومن الأسئلة البسيطة البنسألها للمريض.

🔳مرات سؤال واحد..بيوفر على المريض عملية كاملة.. وأختم بكلمات رائد الطب الحديث

William Osle«”Listen to your patient, he is telling you the diagnosis.”»”اسمع لمريضك جيدًا… فهو غالبًا يخبرك بالتشخيص.”