📌 الصيدلاني دكتور محمد الطاهر يكتب : الناس البتاكل الطين.. متين يكون مفيد ؟ 

جالينوس الطبي الصحة من لدن خبير 

📌 الصيدلاني دكتور محمد الطاهر يكتب : الناس البتاكل الطين.. متين يكون مفيد ؟ 

✍️الصيدلاني دكتور محمد الطاهر

🔳أكل الطين ظاهرة بنلاحظها في بعض الناس خصوصًا بين فئة الأطفال والبنات البالغات والنساء الحوامل، مافي تفسير علمي قطعي لأسبابها لكن في دراسات عديدة بتربطها بالعوامل النفسية، وبرضو بنقص العناصر الغذائية في الجسم زي الحديد والزنك وغيرها .. 

🔳فالراجح إنو أسبابها المرَضية (أنيميا ونقص عناصر غذائية) أو (مشاكل نفسية). 

🔳وطبعاً في أسباب تانية ما عندها علاقة بالأمراض، منها الثقافات والعادات المحلية البتربط أكل الطين بجمال البشرة، أو التبرُّك بالشيوخ وآثارهم، أو تحسين الهضم.. الخ.. وهي عادات غير مسنودة بأدلة علمية.

🔸خطورة أكل الطين: المضاعفات الناتجة من أكل الطين نادرة وبتحصل غالبًا مع الإستمرار في أكل الطين لفترة طويلة، لكن المضاعفات دي إذا حصلت فممكن تكون خطيرة جدًا، وهي: 👈فقر الدم: –أيوة أكل الطين الممكن يكون أساسًا سببو فقر دم، ممكن هو ذاتو يعمل فقر دم ويزيدو ويخلي الوضع مأساوي أكتر.. الطين داخل الأمعاء ممكن يمنع امتصاص بعض العناصر الغذائية المهمة زي (الحديد) و(الزنك) وغيرها، ويعمل أو يزيد فقر الدم. 

👈العدوى: الطين بيحتوي على بكتيريا وطفيليات وبيض ديدان وغيرها من الكائنات الدقيقة الكتيرة شديد، أكل الطين بخليك عرضة للإصابة بالجراثيم والكائنات دي. 

👈التسمم: التراب فيهو معادن زي (الرصاص) و(النحاس) و(الكوبالت) و(الزئبق)، أكلك للطين بعرضك للتسمم بالمعادن دي.. ممكن الطين دا يحتوي على كمية كبيرة من ”البوتاسيوم“ فبخليك عُرضة لإرتفاع البوتاسيوم في الدم البيأدي لمشاكل عديدة منها “عدم انتظام ضربات القلب”. 

البياكلوا الطين ممكن برضو يتصابوا بـ

👈التيتانوس.

👈إنسداد الأمعاء.

🔸طيب فوائد أكل الطين شنو🤔

في حال نقص العناصر الغذائية في الجسم الشخص بيلجأ لتناول الطين والتربة عشان يعوض النقص دا، دا تفسير لجوء مرضى فقر الدم مثلاً لأكل الطين.. 

لكن طبعاً الطين الممكن يحتوي على عناصر غذائية مهمة زي الحديد والزنك، هو عبارة عن (خام) بيحتوي برضو على بكتيريا وفطريات وديدان ومعادن سامة وأجسام صلبة وغيرها من المواد غير القابلة للهضم والمواد السامة.. 

🔳فالأسلم إنو المريض سواء كان طفل أو شخص كبير أو إمرأة حامل، يلجأ للطبيب للحصول على التشخيص المناسب والحصول على العناصر دي مستخلصة في شكل أدوية ومكملات.

🔸طرق إيقاف أكل الطين: 

✅كلم الناس الحواليك .. دا بسهل ليك العلاج جدًا، كلم ناس البيت وأقاربك وصحبك بمشكلتك وخليهم يساعدوك في ابعادك من أماكن التراب البتاكلو أو طينك المفضل.. الوالدين أو الأخوان الكبار ممكن يتعاملوا مع الطفل البياكل الطين بنفس الطريقة، بالإحتواء والدعم النفسي والإبعاد من الطين. 

✅ما تعالج مشكلة تناول طفلك للطين عن طريق ضربه .. كدا حيمشي ياكل طين بالدس ..أدعمو واتكلم معاه ووعيه واحتويه نفسيًا وقابل بيهو طبيب يشخص المشكلة ويعالجها ..

✅أبدا بإستبدال الطين بأكلات منظرها شبيه بالطين.. الحبوب والصمغ والكعك والبسكويت وغيرها.. دا ممكن يساعد في تقليل الرغبة في تناول الطين خصوصًا لدى الأطفال. 

✅مقابلة الطبيب، خصوصًا لو سبب أكل الطين ما معروف بالنسبة ليك، يعني ما مرتبط بعادة دينية أو ثقافية مثلًا.. يلا شكرًا للإهتمام والقراءة، ما تنسى التفاعل والشـ.ير عشان توعي غيرك.