📌من ( شلاقة) فترة الامتياز.. د. ياسر محجوب يكتب : لمن ال(boss بتاعت الباطنية ) قالت لي إنت مازولنا انت بتاع (سيرجري.. جراحة) ساي

جالينوس الطبي الصحة من لدن خبير.

📌من ( شلاقة) فترة الامتياز.. د. ياسر محجوب يكتب : لمن ال(boss بتاعت الباطنية ) قالت لي إنت مازولنا انت بتاع (سيرجري.. جراحة) ساي.

✍️د ياسر محجوب

🔲 في الهاوس مان ، و انا نازل شفت جديد بتاع مديسن ، ف حايم في المستشفى ، عايز اشوف ناس اليونت الاتوزعت معاهم .

🔲 ف شفت لي بنية حلاتا كدا ، و صغنونه قلت اشوف فرصتي معاها ، فقمت سلمت عليها ووريتها اني هاوس اوفيسر مديسن اتوزعت مع بوص ….. و كيفك و كدا و قلت اها نمشي نشرب قهوة كيف وكيف ، فقالت لي قدام ، فأنا اتكيفت وقلت دا القبول ، المهم شربنا الجبنة ، و انا ما خليت بيت شعر حايم ما جبتو ليها ، وأنا لو ما بخاف من السؤال أنا كان وصفتك بالكمال ، وهي تشيل و تتكشم و أنا حاسي بالنشوة و خلاص ما باقي لي الا اقول ليها رقم أبوك كم ، جاءها تلفون قطع الحنك الباهي دا ، فقالت لي ارح معاي مشوار صغير ، قلت ليها قدام ، ح امشي معاك كل الخطاوي الممكنة والما ممكنة زاتا .

🔲 وصلنا طوارئ المديسن شوف عيني الرجسترارس ديل يطاقشو و يتكبكبو و شابكنها ي بوص كيفك و الحالات و بوروا فيها العيانين و بسلموها ، الاسم طلع ياهو زاتو الوزعوني معاهو ، عقلي سمع ، لكن قلبي رافض ، مسكت لي واحد بالجنبه كدا اسمعني دي منو ، قال لي دي اخصائية الباطنية ، الساعه ديك كرعيني بردن و قلبي دا شغال دق دق دق ، دا شنو الموقف البايخ الختيت نفسي فيهو دا .

🔲ف لملمت باقي ال ATP العندي و مرقت بيها من الer.. الطوارئ ومشيت على مكان حبنا الاول و طلبت اتنين جبنه و شاي و قعدت متمحن ، و اشوف ح اقول شنو عشان امرق من الوحل دا ، فإذا بها زولتي كملت مرورها وجات لقتني في مكاني ، سلمت و قعدت و قالت لي كلمة واحده لي الليله انا بتذكرها ، انت يا ياسر زول زابط و شكلك فرفوش لكن صدقني أنت مازولنا.. انت لاااينك( تخصصك) (سيرجري.. جراحة) و بقيت بسمع صدى سيرجري سيرجري ليه قلت كدا ، قالت لي ح تكبر و تعرف ، انا لي اسه ما عرفت لي قالت كدا 🤣🤣🤣🤣

🔲حاليا أنا نائب أخصائي جراحه 🤣🤣🤣