جالينوس الطبي الصحة من لدن خبير
📌د. أحمد عدلان يكتب : ما تباري الرمم.. النجاح ببدأ من صلاة الصبح.
د. أحمد عدلان
♥️ طبعاً ابوي من الأباء الصعبين جداً
الصلاة في زمنها ولو جات صلاة وانت ما مشيت الجامع يا ويلك وسواد ليلك.
ياخ بتذكر مرة جوني اصحابي دكاترة في البيت
🔳ابوي بعد ما سلم علينا ومشى
وقت جاء وقت الصلاة قال لينا:
يا دكاترة معليش، قوموا صلوا وتعالوا راجعين اتونسوا.
ماف زول بقدر يقعد برا البيت اكثر من الساعة ١٠ نهائي
كل الناس تجمع البيت قبل ١٠ كبار وصغار
مبيت برا البيت ماف ابدا الا لي ضرورة قصوى 👌
🔳بنزعل جدا من حركات ابوي دي وما عارفين انه دا لصالحنا
اغتربنا وقعدنا مع ناس الصلاة بي المزاج
والجامع فقط يوم الجمعة والعيد
🔳بالنسبة لي موضوع القراية دي قصة براها
ابوي كل ما يلقاني زهجان من القراية بيجي يقول لي
اجتهد في قرايتك وكل الناس الفاتوك بتلحقهم
وانا من دخلت كلية الطب أبوي بيقول لي يا دكتور
إسم أحمد دا طولت شديد ما سمعتوا منه
دا كلو علشان أبوي بحترمنا جدا جدا
🔳أسال اي إنسان من قرية ودالفادني بعرف كويس يعني منو
مصطفى عدلان الشريف
إتربينا على الطموح وحب العلم ونشر العلم
مرة بتذكر في الثانوي جبت درجة ما عجبتني
أبوي قعد معاي واداني نصائح عن الطموح كثيرة
و إنه النوم الكثير ما بقدم إنسان عنده طموح
و المهموم ما بنوم
ولو انت قلبك حار ما بترتاح الا تصل هدفك
🔳ما تباري الرمم، وصاحب الناجحين علشان تنجح
فمن دخلت الجامعة زاد فينا الطموح والاجتهاد
انا طيلة الجامعة صاحبي كتابي
بساهر وبتعب وبنوم وبصحى بي القراية
البيت بتاعنا كلو ورق وكتب حقتي
طبعا الدعامة شرطوا كل المكتبة والكتب الحمد لله على كل حال
🔳كل القصة دي علشان اقول لأخواني
خليك مع ربنا في الأول والأخير واجتهد واسعى واعمل بالأسباب
ما تتعود على الغش والبخرات
انجح بي تعبك
جيب ٥٠ بي تعبك ولا ٨٠ بي غش
الحياة مستمرة
والفاشل من توقف عن المحاولة
⚫📣أختم واقول
You don’t have to be great to start, but you have to start to be great
دكتور أحمد مصطفى عدلان
