♨️ تثقيف صحي
✍️ د. ماجد المبشر
📌 يادكتور التطعيم فات ولدي
👩👦 أولاً: سيناريو الطبيب مع الأم
المشهد: أم داخلة العيادة شايلة طفلها عمره ٥ شهور. الطفل شكله صحي لكن الأم متوترة.
الأم: سلام عليكم دكتور. أنا صراحة جاية في موضوع التطعيم. ولدي ده ما طعمتو من أول ما اتولد. فات عليّ الزمن وما قدرت أجي. خايفة شديد يكون حصّل ليهو ضرر.
الطبيب: وعليكم السلام ورحمة الله. أول حاجة، ما تخافي. التطعيم ما عندو زمن محدد بينتهي. صحيح في جدول رسمي، لكن أي جرعة فاتت ممكن تتدارك. أهم حاجة نبدأ هسع وما نأجل أكتر.
الطبيب: شوفِ يا أمي، عندنا جدول للتطعيم في السودان:
عند الولادة:
ضد الدرن (BCG) عشان يحمي من السل.
جرعة صفرية شلل الأطفال (نقط في الفم).
عند ٦ أسابيع:
شلل الأطفال (الجرعة الأولى).
الخماسي (جرعة أولى: بيحمي من الدفتريا، السعال الديكي، الكزاز، التهاب الكبد ب، المستدمية النزلية).
الروتا (عشان الإسهالات الفيروسية).
عند ١٠ أسابيع:
نفس الجرعات (شلل + الخماسي + الروتا) كجرعة ثانية.
عند ١٤ أسبوع:
نفس الجرعات (شلل + الخماسي + الروتا) كجرعة ثالثة.
عند ٩ شهور:
الحصبة.
عند ١٥ شهر:
الحصبة + الحصبة الألمانية.
⚠️ لو فاتت جرعة
الأم: طيب أنا فاتتني الولادة و٦ و١٠ و١٤ أسبوع. أعمل شنو؟
الطبيب: عادي جداً.
بنبدأ مباشرة بالجرعة اللي فاتتك، ونكمل الباقي حسب العمر.
مثلاً لو الطفل عمره ٥ شهور ولسه ما أخذ الخماسي، بنديهو الآن الجرعة الأولى، وبعد شهر بنديهو الثانية، وبعد شهر تاني الثالثة.
شلل الأطفال نفس الطريقة.
الروتا لو فاتت بعد ٦ شهور، ما بنديهو، لأنو ما بيفيد بعد العمر ده.
الحصبة ممكن تدي في أي وقت بعد ٩ شهور.
يعني المهم نكمل، وما نوقف.
الأم: طيب لو نسيت مرة تانية أو اتأخرت؟
الطبيب: كل ما اتأخرت الجرعة، الطفل بيبقى معرض للخطر. لكن حتى لو اتأخرتي شهور، ما في حاجة اسمها “سقطت” أو “راحت”. أي جرعة ممكن تلحق في أي وقت.
🌡️ الآثار الجانبية
الأم: أنا برضو خايفة من السخانة.
الطبيب: طبيعي بعد الإبرة يجيهو سخانة خفيفة أو انتفاخ في مكان الحقنة. دي بتروح في يومين. لو السخانة عليت شديد أو الطفل بقى خامل، بنرجع المركز. لكن دي نادرة.
ي امي
الطبيب: يا أمي، لو فوتي جرعة ما نهاية الدنيا. المهم تلحقيها وتكملي الجدول. كل جرعة بتحمي ولدك من مرض خطير. والتطعيم حق مجاني وأمانة في رقبتنا.
الأم (مبتسمة): والله جزاك الله خير يا دكتور. بكرة إن شاء الله بمشي أكمل ليهو.
♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️
🩺 ثانياً: شرح تفصيلي لأطباء الامتياز
تعالو هنا
يا دكاترة، موضوع التطعيم من أهم المسؤوليات في طب الأطفال. ودي نقاط لازم تركزوا فيها خصوصاً مع الأمهات:
1️⃣ أهمية التطعيم
التطعيم ما بس حماية للطفل، هو حماية للمجتمع كله (مناعة القطيع).
الأمراض البتحمي منها اللقاحات (شلل الأطفال، الدفتريا، الحصبة…) لحدي الآن خطيرة وموجودة
2️⃣ التعامل مع فوات الجرعات
دي النقطة الأمهات بيسألوها كتير. مهم جداً نعرف:
ما في حاجة اسمها الطفل “ضاع” من التطعيم.
أي جرعة فاتت لازم تتدارك.
BCG (الدرن): ممكن يتدارك لحد ١٢ شهر. بعد كده فائدته أقل
شلل الأطفال: أي وقت لحد ٥ سنين.
الخماسي: لو فاتت في الشهور الأولى، بندي أول جرعة ونكمل الباقي بفواصل شهر.
الروتا: لو فات الطفل عمر ٦ شهور، ما بنديهو لأنه غير فعال.
الحصبة: أي وقت بعد ٩ شهور.
3️⃣ دوركم كأطباء امتياز
لازم تحفظوا الجدول السوداني وتعرفوا بدائلو في حالة التأخير.
الشرح للأم لازم يكون بلغة مبسطة:
قولوا: “التطعيم بيحمي من الأمراض الخطيرة” بدل “Immunization against infectious diseases”.
الطمأنة: معظم الأمهات بتخاف من السخانة والبكاء. لازم نطمن إنو طبيعي.
التشجيع بدل اللوم: لو الأم قصرت أو نسيت، ما نلومها. نقول: “الحمد لله لسه عندك فرصة، يلا نكمل الجدول”.
4️⃣ الآثار الجانبية
شائعة: سخانة خفيفة، ألم موضعي، بكاء.
نادرة: حساسية شديدة (لازم المراكز تكون مجهزة).
نصيحة مهمة: قولوا للأم تدي خافض حرارة لو السخانة عليت.
يعني دكتور اطفال عايز يقول ليكم
التطعيم برنامج قومي مهم جداً، لازم يكون في ذهنكم دايماً.
ما في جرعة بتضيع، أي واحدة ممكن تتلحق.
دوركم ما بس إعطاء اللقاح، لكن التوعية والإقناع
