📌 د. إسراء الطاهر تكتب : يا ناس الوزارة خلاص حأسوقهم وأدربهم في أقرب جامع.

جالينوس الطبي الصحة من لدن خبير 

📌 د. إسراء الطاهر تكتب : يا ناس الوزارة خلاص حأسوقهم وأدربهم في أقرب جامع. 

✍️ د. إسراء الطاهر 

🔷أول أيام الحرب ومع قطعة الموضوع والاحساس بانو الواحد مامفيد فلازم نعمل حاجات تفيد الناس قررنا انا ود. ياسر جبره انو نسافر لي كم مدينه في السودان نعمل ورش تدريب على أساسيات الطوارئ والعناية المكثفه، وطبعا مع موضوع الفلس استغليت جمعية طب الاطفال انو تتواصل لينا مع صندوق اعانة المرضى يدعموا لينا الورشه بالترحيل والمنصرفات وجزاهم الله خير استجابوا للدعوة

🔷 وسافرنا وعملنا ورش جميله انستنا هم النزوح وفرحة منا بهذا الانجاز في عز الحرب نزلنا الصور بي الستاند حق ناس الصندوق وفيه اسم الجمعيه والصندوق كراعاة للورشه، ففي واحد اخونا من ناس الوزاره الله يطراه بالخير ضرب لي انو كيف ما انزل اسم الوزاره، فانا قلت ليه الوزاره دخلها شنو بالموضوع🤔 قال لي كيف انتو بتدربوا ناسنا في مستشفياتنا 😲 قلت ليه خلاص حاسوقهم أقرب جامع وادربهم هناك واصلا اللابتوب حقي والبروجكتر حقي و الفنتليتر شاحداه من ناس المستشفى الكويتي.

🔷الجاب الموضوع انو امس نزلت بوست عاوزه اعمل شعار للعنايه المكثفه فدخل على واحد من ناس الوزاره بيجادل فيني انو مفروض ناخد الأذن من الوزاره في اللوقو و هو نحن فكرنا في التصميم برانا وعملناه برانا وطبعناه بي قروشنا الشخصية ماقروش المستشفى فناس الوزاره محتاجين يفهموا انو منسوبيهم في المستشفيات هم في الغالب متطوعين، وانو الناس قاعده بتخدم عشان هي عاوزه تخدم بدون قروش ولا مرتبات ولا معينات عمل حتى. الوحيدين البياخدوا قروش هم اللي شغالين في الوزارة. فإذا عاوزين نشتغل بالشغل ال ideal زي ماهو بيتفلسف يبقى ideal في كل حاجه، ” اتؤمنون ببعض الكتاب وتكفرون ببعض” 

🔷وللصدف استحضرت بيت شعر قالو لي د. الادريسي الصباح وعملت ليه تفتيش:

لا خَيلَ عِندَكَ تُهديها وَلا مالُ

فَليُسعِدِ النُطقُ إِن لَم تُسعِدِ الحالُ

وَاِجزِ الأَميرَ الَّذي نُعماهُ فاجِئَةٌ

بِغَيرِ قَولِ وَنُعمى الناسِ أَقوالُ

فَرُبَّما جَزِيَ الإِحسانَ مولِيَهُ

خَريدَةٌ مِن عَذارى الحَيِّ مِكسالُ

وَإِن تَكُن مُحكَماتُ الشُكلِ تَمنَعُني

ظُهورَ جَريٍ فَلي فيهِنَّ تَصهالُ

وَما شَكَرتُ لِأَنَّ المالَ فَرَّحَني

سِيّانَ عِندِيَ إِكثارٌ وَإِقلالُ

لَكِن رَأَيتُ قَبيحاً أَن يُجادَلَنا

وَأَنَّنا بِقَضاءِ الحَقِّ بُخّالُ

🔷كسره التصميم دا عامله ولد اختي الصغيرون عشان يساعد خالته وانا مبسوطه بيه جدا ومكيفني لما عملتو خلفيه اللابتوب حقي.