جالينوس الطبي الصحة من لدن خبير
📌 نافذة التمريض // عبدالرحمن تمريض يكتب : الخط الأحمر.. حقوق المريض.
✍️ عبدالرحمن تمريض
☘️لما خشيت الجامعة كان ادونا مادة اسمها أخلاقيات المهنة وتقريبا المادة دي موجودة في كل تخصص ومن محتويات المادة دي نحن في التمريض انو العيان عندو مجموعة من الحقوق عددهم 10 وهي
1. الحق في الاحترام والكرامة 🙏
العيان ما رقم سرير ولا ملف أخضر. ناديهو يا حاج، يا أمي، يا أستاذ. دق الباب قبل تدخل وأستأذن. وقت الغيار أو الكشف غطيهو كويس. ما تضحك على لهجتو ولا شكلو ولا تعبو. هو ما اختار المرض، المرض هو الاختيارو.
2. الحق في المعلومة 📋
من حقو يفهم الحاصل عليهو شنو بالدارجي. عندو شنو، وحنعمل ليهو شنو، وليه. الدواء دا بعمل شنو وبضر بشنو. العملية نسبة نجاحها كم. والتكلفة كم تقريبا. ما تدس منو الحقيقة عشان ما يتخلع، لانو المجهول بخوف أكتر من المرض زاتو.
3. الحق في الاختيار ✅❌
بعد تشرح ليهو كل حاجة القرار حقو براهو. عايز يتعالج ولا رافض العلاج حتى لو كان عملية كبيرة. انت عليك تنصحو وتوريهو بحصل شنو لو رفض، بس ما تجبرو ولا تقول ليهو لو ما وافقت بنطلعك. ولو في طلبة أو تصوير أو بحث لازم هو يوافق أول ويوقع بي يدو.
4. الحق في السترة والسرية 🤐
ملفو دا ما موضوع ونسة في جبنة الصباح. حالتو ما ترسلها استوري في القروب. وقت الكشف جر الستارة، ما تخلي العنبر كلو يتفرج. أي كلمة قالها ليك خليها بينكم، دي أمانة.
5. الحق في شغل نضيف وآمن 💉
دواهو يجيهو في وقتو وبالجرعة الصح. الغيار بتعقيم ما بقطنة واقعة في الواطة. ما تتعلم فيهو حاجة جديدة براك. ولو حصل غلط مننا نوريهو ونعالجو، ما ندس. ومن حقو يقول داير دكتور تاني يشوفو وعادي ما تزعل.
6. الحق في مسكن للألم 💊
كلمة اتحمل شوية والرجال ما ببكو دي خلوها. الألم ما رجالة. من حقو ياخد مسكن مناسب عشان يرتاح وينوم. الألم بوقف الشفاء وبكسر النفسية. شغلنا نريح العيان ما نعذبو.
7. الحق في أهلو وناسو 👨👩👧👦
العيان براهو بزهج وبستسلم سريع. خلي أهلو يزوروهو في الزمن المسموح. دعوة من أمو وقعدة أبوهو جنبو مرات بتكون أقوى من أي علاج. إلا لو كان في العناية وحالتو ما بتسمح.
8. الحق في إنو يتكلم 📣
لو حس بظلم أو تقصير من حقو يشتكي للإدارة. وما تخوفو ولا تعاملو كعب عشان فتح خشمو. الشكوى دي بتورينا غلطنا وين عشان نصلح نفسنا.
9. الحق في الاستمرارية في الرعاية 🔄
من حق العيان ما يتقطع علاجو فجأة عشان الشفت انتهى أو الدكتور سافر. يعني لازم يكون في تسليم وتسلم واضح بين التيم. لو حتحولو مستشفى تاني لازم يمشي بتقرير كامل وتكون مرتب ليهو. ما تخليهو في النص زي الضايع لا عارف يمشي وين ولا يكمل كيف. حتى بعد يطلع من المستشفى من حقو يعرف يتابع مع منو ووين وامتى.
10. الحق في بيئة نظيفة وآمنة 🏥
🔳من حق العيان يتعالج في مكان نضيف ومرتب وما فيهو خطر. السرير نضيف، الحمام نضيف، الأرض ما مزحلقة، أدوات التعقيم شغالة، مافي حشرات أو فئران لافة. وحتى الأكل المفروض يجيهو نضيف ومناسب لحالتو. المستشفى الوسخانة براها مرض. والأمان دا يشمل كمان إنو ما يتعرض لسرقة ولا تحرش ولا إهمال يضرو.
🔳العيان دا احتمال بكرة يكون أبوك أو أمك أو انت ذاتك. شغلتنا دي إنسانية قبل أي شي. احترمو وحافظ على حقوقو هو بشيلك فوق راسو وبساعدك في علاجو. المستشفى ما معتقل، والعيان ما مجرم.
💢الكلام دا ما تحفظو للامتحان وتجدعو. دا قانون الشفت بتاعك كل يوم. اشتغل بيهو وربنا يبارك ليك في رزقك ❤️
