📌 د. هناد كمال يكتب : ونسة في الإسعاف مع شاب في شبه حالة حرجة.. سألني : انتو يا دكتور ليه الدكاترة ديل ما يكونو أكثر الناس إيماناً؟

جالينوس الطبي الصحة من لدن خبير 

📌 د. هناد كمال يكتب : ونسة في الإسعاف مع شاب في شبه حالة حرجة.. سألني : انتو يا دكتور ليه الدكاترة ديل ما يكونو أكثر الناس إيماناً؟ 

✍️ د. هناد كمال 

🔳أمس كنت مسؤول من نقل حالة شبه حرجة من مستشفى لي مستشفى آخر الحالة كانت لشاب في نهاية العقد الثاني من عمره أصيب بحادث حركة وهو متجه إلى عرس صديقه كان واعي وبتكلم شاب مظهره مريح صابر والإيمانيات في وجهه بعد ركبنا الإسعاف حسيت بيه شوية مقلق فقلت أتونس معاه شوية عشان أخفف عليه بدينا نتحدث لقيته متفاعل معاي وبيسألني عن الطب وهل الطب ساهل ولا صعب سألني سؤال بعدها قال لي حاجة قريبة شوية قال لي: “انتو الدكاترة أكتر ناس مفروض تكونوا مؤمنين لأنكم بتشوفوا حالات كتيرة وبموت قدامكم ناس كتار” هو شكله ملتزم قال لي: “يا دكتور في حديث أنا أول ما أحس بمعناه بتذكره بقول: من أصبح منكم آمنا في سربه معافى في جسده عنده قوت يومه فكأنما حيزت له الدنيا”

🔳 استوقفني كلامه وفكرت فيه عشرات المرات صحيح إنو بنشوف حالات كتيرة في اليوم وبموتوا ناس كتار لكن بطبيعة الإنسان لمن يتعود على شيء بيألف عليه وبقل عنده التفكير خارج حدود الموضوع لكن إيمانك لمن يكون قوي كل ثانية بتذكرك قدر شنو انت

🔳مفروض تعرف إنو الحياة غير مضمونة وإنو أي شيء ممكن يتغير في أقل من ثانية وإنو الحياة ما مستاهلة كل هذا التفكير والعناء الإنسان مرات بينشغل بالدنيا لدرجة بنسى إنو أكبر نعمة عنده هي اللحظة البعيشها إنو يصحى وهو قادر يقوم يتنفس يمشي يشوف أهله والناس البحبهم بنفتكر إنو الحاجات العادية دي حق مكتسب لكن الحقيقة إنو كل يوم بنعيشه هو فضل ورحمة من ربنا يمكن نحن محتاجين نتذكر معنى الحديث ده لأنو فعلا أغلب الحاجات البنفتكرها سعادة ما بتساوي قيمة الأمان والعافية والطمأنينة الحياة بتجري بسرعة ونحن بنأجل حاجات كثيرة مهمة بنأجل التوبة بنأجل الصلح بنأجل كلمة طيبة وكأننا ضامنين إنو عندنا وقت لا ينتهي لكن في المستشفى بتتعلم إنو الإنسان ما بملك غير اللحظة البين يديه يمكن أعظم درس بتعلمنا ليهو الحالات البنشوفها إنو الدنيا ما دار بقاء وإنو الإنسان مهما امتلك أو وصل في النهاية راجع لربه عشان كده الم.فروض ما نخلي الدنيا تسرق مننا علاقتنا بالله ولا نخلي المشاكل الصغيرة تاخد أكبر من حجمها

🔳ربنا يكتب ليو السلامة ويعافيه ويجازيه كل الخير لو شاف البوست ده