♨️ تثقيف صحي 

📌 د. محمد عوض الكريم الإدريسي استشاري الأطفال يكتب : سيناريو (الكحيحة دي تراها ما هينة) 

✍️ د. محمد عوض الكريم الإدريسي 

🔳عارف آالحاج أخوي المرض ده ابدا ما شيتا هين

🔳مالك آمنوفلي الليلة مسكين وكلامك ما اياهو حننتني عديل ياخ😢

🔳عارف آالحاج اخوي الفترة الفاتت دي عملت بحث زي ما بقولوا الدكاترة وناس العلم اي جنا من الحلة جاتو كحة ورقد مستشفى وصلتو اخرو تب، شفت تشخيصو النهائي و العلاج الادوه ليه، فلقيت الموضوع ده تمبلولووو عديل الكحيحة دي تراها ما هينة ابدا ☹

🔳شفقتني آمنوفلي كدي قول لي نتايج بحثك و التوصيات الطلعت بيها شنو؟ 

🔳اها النقوليك نتايج البحث وبعداك إت عليك التوصيات،

قول بسم الله

اولا بالتبادي 

▪️ود علي ودالفضل عمرو 5 شهور مشى بكحة وضيق نفس شخصوه التهاب قصيبات هوائية، 

▪️ود النعمة بت الطاهر عمرو 5 شهور لكن متردد مستشفيات زي ابوه زمان واخوانو برضو مشى بكحة وضيق نفس طلع عندو ربو شعبي عديل 

▪️ ود أمحمد ود الطيب عمرو 6 شهور عندو كحة وضيق نفس زيهم في الظاهر لكن قالوا مشكلتو خطيرة عندو فشل قلب بسبب ثقب في القلب

▪️ وبت عبدالرحمن ود علي عمرها 4 شهور عندها كحة وضيق نفس وبترجع كتير وصحتها تعيبانة، كملانة من لحم الدنيا قالوا عندها ارتجاع مريئ،

▪️ ودعمها النقر نديدها ده كمان برضو كحة وضيق نفس هسي عايزين يدخلوه عملية لفتحة بين المريئ والقصبة الهوائية 

▪️ بت علي ودالفاضل عمرها شهرين برضها حمى وضيق نفس قالوا ده تسمم دم وليدى متأخر محتاجة مضادات بالوريد 7 ايام 

▪️ ود بهاء الدين ده كمان 3 شهور كحة وضيق نفس طلع عيب خلقي في الرئتين الفشفاش بتعرفو وهسي عمليتو بعد يومين

 🔲 و عييييك نضما كتر يا الحاج اخوي، انا بقيت بخاف من الكحيحة القبيحة دي😢😢😢

وتاني ما بشرب ولا بدي واحد من اولادي دواء كحة من غير استشارة طبيب 

🔳اها قول توصياتك يلا

ات آمنوفلي خليت لي شنو اقولو ما تراك قلتها كلها

ما تحقر الكحة وضيق النفس في الشفع

وبين وديان العلاج البلدي تمشي تتسكع

بعدين بعد المضاعفات تترادم وتتوسع

لو مشيت للدكتورتاني كلامو ما بيشفع

كع ما تدي دواء الكحة لاي زول بكحكح

 نوع الفتيل البحوم بالفريق بفوق الحيطة 

#تشابه_الاعراض_لا_يعني_تطابق_الامراض

#تطابق_الامراض_لا_يعني_تطابق_العلاجات

#أبومصعب