♨️ تثقيف صحي  عام 

📌 د. أحمد عدلان يكتب : ناس أديني فتيل (جلسرين) اعملو حسابكم. 

✍️ د. أحمد عدلان 

◼️اتكلمت عن الجلسرين في الصفحة حتلقاه الرابط في اول تعليق، منشور كامل من بداية تاريخه لحد استخدامه لكن في سؤال في التعليقات وقالوا نتكلم عن ​منو الناس اللي ما بنفع ماهم الجلسرين ؟ 

يلا حا اتكلم عن الحالات الما بنفع معاها 

​1️⃣ أولاً الناس القاعدة في جو “جاف شديد” (ناس السموم والسخانة الناشفة) 🔥

علمياً الجلسرين زي ما قلت ليك في منشور الجلسرين هو “حرامي رطوبة” (Humectant).

فكرته إنه بيسحب الموية من الجو برا ويدخلها في جلدك جوه.

أها، لو الجو برة ناشف وما فيهو رطوبة (Low Humidity) الجلسرين ح يعمل شنو؟

اكيد ما حيلاقي موية برة، فحيقوم يسحب الموية من أعماق جلدك إنت ويطلعها برا لسطح جلدك، وهناك تقوم تتبخر! يعني حرفياً “بينشفك” زيادة من جوه جسمك.

💡 الحل: لو الجو جاف، لازم تخلطه مع موية أو تمسحه وجسمك مبلول، ما تمسحه “سادة” وتطلع في الشمس ساي.

​2️⃣ الناس البتستخدمه “خام” ناس فتيل الجلسرين 😅البيكون مركز (100%) 🧪

فالجلسرين النقي (Undiluted) بيكون لزج وتقيل جداً.

الأطباء بقولوا إنه ممكن يسحب الموية بقوة لدرجة إنه يعمل ليك تهيج (Irritation) واحمرار، وممكن يخلي الجلد يحرقك شديد(Stinging sensation).

💡 النصيحة: لازم يتخفف! اخلطه مع موية ورد، ليمون (للجسم)، أو حتى لو ما لقيت جيب شوية موية عادية وخففها بيه قبل ما تمسحه.

​3️⃣ الناس البشرتهم بتتحسس وبتلتهب بسرعة 

يا جماعة بالرغم من إنه الجلسرين دا آمن، بس لو عندك جرح مفتوح أو إكزيما ملتهبة وبتاكلك شديد، الجلسرين المركز ممكن يزيد الحكة.

​4️⃣ اهم ناس هم ناس البشرة الدهنية ركزوا معاي هنا :

وضحت قبل كدا انو الجلسرين براهو ما بسد المسامات (Non-comedogenic)، لكن لأنه بيلصق اي حاجة.

فلو مسحته وطلعت الشارع،تراب السودان ده كلو ح يلصق في وشك! 🌪️

◼️وانت عارف انو التراب مع العرق مع الجلسرين = خلطة ممتازة عشان تقفل المسامات وتطلع ليك حبوب، علشان كدا في ناس بقولوا ليك بطلع لينا حبوب.