جالينوس الطبي الصحة من لدن خبير
📌بروفيسور المعز عمر بخيت يكتب : خنازير السوشيال الميديا.
✍️ بروفيسور المعز عمر بخيت
⚫ تنزل قصيدة او اغنية جميلة او تشيد بمطربة بتكون معظم التعليقات جميلة والحمدلله، وحيث ان الخير بخص و الشر بعْم بطلعوا ليك الخنازير المتنمرة وبمنتهى الصفاقة وقلة الادب والاساءات الشخصية يجوطوا ليك البوست دون حياء ودون سبب او علاقة بموضوع المنشور.
⚫ نعم، ادري انهم اصحاب عاهات نفسية واخلاقية وتربوية.
⚫ الغالبية بقولوا ليك طنشهم، بس ده ما حل مبتكر. او رد عيهم باخلاقك لكن كمان المسالة فاتت الحد! او رد عليهم بالمثل (العين بالعين والسن بالسن والبادي اظلم).
⚫أنا شخصياً مع الرجرجة دي بستخدم مزيج من التلاتة حلول:
1. بطنش وامسح واحظر
2. برد بادب
3. برد الصاع عشرة
⚫وده كلو بكون في بوست واحد. وبصراحة كل واحد من التلاتة ديل بمارسه حسب قذارة الخنزير المتنمر لكن من المستحيل ان أمارس واحدة منهم على طول.
⚫المهم، البوست ده بس عشان احبابي وأصدقائي العقلاء يكونوا عارفين انا ليه في كل مرة بكون واحد من التلاتة ديل وبمنتهى الرضى والتصالح مع النفس، وزي ما قال صديقي الشاعر العظيم هاشم صديق عليه رحمة الله:
📢⚫📢أعرف متين أبقى المطر 🌧، وافهم متين اصبح حريق 🔥.
