📌استراحة الجمعة // د. أحمد عدلان يكتب : لو سألتني منو أهم دكتور ساعدك تصل للمكان الإنت فيه هسع دا يا دكتور أحمد ؟حأقول ليك، وبكل الفخر الفي الدنيا هي : أمي

جالينوس الطبي الصحة من لدن خبير 

📌استراحة الجمعة // د. أحمد عدلان يكتب : لو سألتني منو أهم دكتور ساعدك تصل للمكان الإنت فيه هسع دا يا دكتور أحمد ؟حأقول ليك، وبكل الفخر الفي الدنيا هي : أمي. 

✍️ د. أحمد عدلان 

🔅 لو سألتني: من أهم دكتور ساعدك تصل للمكان الإنت فيه هسع؟حأقول ليك، وبكل الفخر الفي الدنيا:أمي. ❤️أمي ما دكتورة…ولا عندها علاقة بالمجال الطبي أصلاً.

🔳لكن لو سألتني منو القعد معاي من البداية؟منو القراني وأنا لسه فاتح عيوني على الدنيا؟منو علمني الإنجليزي؟منو فهمني الكيمياء والفيزياء؟منو قعد معاي في كل مادة ممكن تخطر في بالك؟أمي.

🔳والله أمي كانت مدرسة كاملة براها.كانت تقريني، وتصبر علي، وتعيد المعلومة لو ما فهمتها، وتفرح بالحاجة الصغيرة قبل الكبيرة.

🔳وأي نجاح أنا وصلت ليهو اليوم، بعد فضل الله سبحانه وتعالى، الفضل فيه لأمي و أبوي.لكن في حاجة معينة أمي كانت مختلفة فيها…

🔳كانت مؤمنة بي.في الوقت الباقين كانوا ممكن يشوفوا إنو الطريق صعب…أمي كانت شايفة إنو أنا ممكن أصل.في الوقت الباقين كانوا بيراهنوا على فشلي…

🔳أمي كانت بتراهن علي أنا.. ويمكن أبوي كان داعم لي بصورة كبيرة، لكن ما أقدر أقول إنو كان واثق 100% إني حأصل للمكان ده.لكن أمي؟أمي كانت مصدقاني قبل ما أنا ذاتي أصدق نفسي.

🔳كانت بتفتخر بي قبل ما يكون عندي أي إنجاز يستاهل الفخر.. وده يمكن يكون من أكبر الأسباب الخلتني أصر على النجاح.

🔳لأنك لما تلقى زول مؤمن بيك بالشكل ده…بتبقى ما عايز تخذلو.. بتقول:”لازم أنجح… عشان الزولة دي ما كانت غلطانة فيني.”

🔳والحقيقة مهما كتبت…ما حأوفي ولو نقطة صغيرة من الحاجة العملتها عشاني.

🔳وما بقول الكلام ده بس لأنك أمي…لا.بقول الكلام ده لأنك إنسانة، بصراحة، ما أظن يكون في زيك… وما حيكون في زيك.وأنا بكتب الكلام ده هسع، دموعي جارية…

🔳وجرت في بالي ذكريات كتيرة بيني وبينك.. ذكريات أنا لحدي الليلة فخور بيها…وفخور أكتر بحاجة واحدة:إنك إنتِ أمي. ❤️

🔳وأجمل حاجة في علاقتي بيك إنو مكالماتنا ما عندها زمن.ممكن نتونس بالساعات نضحك…تحكي لي عن الحاصل في القرية…تحكي لي أخبار الأسرة…

🔳وأنا والله ما بزهج من كلامك.بالعكس…مكالمتك بالنسبة لي راحة.وطبعاً، أمي اسمها سناء…ربنا يحفظها ويطول عمرها في الخير. ❤️والله لمن أكون في قريتنا وأسمع الناس يقولوا:”أحمد ود سناء”بتكيف شديد.

🔳لأنو الاسم ده بالنسبة لي ما مجرد اسم أم…ده اسم مدرسة كاملة في حياتي.أمي في قريتنا ما معروفة بس لأنو عندها أولاد…معروفة لأنو هي الزولة البتقيف مع الناس.

🔳في فرح تلقاها…في كُربة تلقاها…في مناسبة تلقاها واقفة مع الناس.ويمكن دي من الحاجات الكتيرة الاتعلمناها منها من غير ما تقعد تدرسنا ليها.

🔳وأكتفي بحاجة واحدة بس:إنتِ يا أمي ما كنتِ طبيبة…لكن ساهمتي في إخراج أربعة أطباء من أولادك.اللهم بارك. ❤️وما كنتِ أستاذة جامعة…

🔳لكن ساهمتي بصورة مباشرة وغير مباشرة في تشكيل الناس العملوا، وبيعملوا، في نقل العلم لطلاب العلوم الصحية في السودان وخارج السودان.يمكن الناس تشوف الطبيب الواقف قدامهم…لكن ما تشوف الأم الواقفة وراه سنين طويلة.يمكن يشوفوا الشهادة…

🔳لكن ما يشوفوا السهر والتعب والدعوات والانتظار والصبر.يمكن يشوفوا النجاح…

🔳لكن ما يعرفوا كم مرة كانت في أم قالت لولدها:”واصل… إنت بتقدر.”وعشان كدا يا أمي…لو في يوم من الأيام الناس قالت:د. أحمد عدلان وصل كيف؟”

🔳أنا عندي إجابة بسيطة جداً:بعد فضل ربنا… كان في أم اسمها سناء. ❤️ربنا يحفظك يا يما، ويجعل كل حاجة عملناها في ميزان حسناتك.

🔳ويجزيك عني، وعن أولادك، وعن كل زول انتفع مننا خير الجزاء.ويرفع قدرك في الدنيا والآخرة…ويرزقني برك…ويقدرني أرد ليك ولو جزء بسيط من الجميل العملتيه عشانا… الفي الصورة دي حبوبتي صفية ام امي 🔳أحمد ود سناء 🌹