جالينوس الطبي الصحة من لدن خبير
📌إستراحة الجمعة //د. أحمد عدلان يكتب: متين مرات ببكي بي حرقة؟؟
✍️ د. أحمد عدلان
🔳بتذكر ايام انا في الثانوي كان ابوي اداني نصيحة سمحة خلاص
ما عرفت قيمتها الا بعد دخلت الجامعة.
قال لي : اذا تعلق قلب المرء بالثريا لنالها
طبعا ما اكذب عليك والله الثريا دي شنو ما عارفها
المهم مرت الأيام والسنتين ودخلت الجامعة و وعيت لكلام أبوي
من نعمة ربنا علينا انا واخواني انو مصطفى عدلان دا طلع ابونا
والله دا توفيق من ربنا واقدار جميلة كانت سبب في حاجات كثيرة سمحة ما ممكن تتخيلها
نحن أسرة بتحب العلم وقمنا على كدا
🔳أبوي دا من قمنا بنلقاه بيقرا بحب الثقافة الطبية شديد
عارف كثير عن الأدوية وتداخلاتها واستخدامتها
كان بجيب المجلات الطبية من دول برا علشان يتعلم
اها من هذا المنطلق نحن شبينا
والله أبوي وامي تعبوا معانا شديد جدا
امي كانت هي السبب الأساسي إنه نعرف نقرا ونتعلم
🔳امي هي الاستاذ الأول في حياتنا انا واخواني
امي بتقرينا وتقرا معانا وما شاءالله علمتنا كل حاجة
اللغة الإنجليزية كل أساسياتها علمتنا ليها أمي
اللهم احفظهم واحفظ جميع الأمهات والاباء وارحم الميتين منهم
🔳اها نرجع للجامعة
بدينا الجامعة والحمد لله اتوفقنا وبقيت اجي من الأوائل في الدفعة في الطب
صاح في حاجات كثيرة ساعدت في إنه نتفوق وننجح
🔳بس اهم حاجة
هي العزيمة والإرادة والإصرار الشلناه من أبوي
وحب المعرفة والصبر على العلم الشلناه من أمي
احكي ليك حاجة غريبة
والله العظيم مرات ببكي حرقة وقت ما اعمل الحاجة الخاتيها في بالي او ما اخلص الحاجة البيني وبين نفسي.
كنت بحب اتحدى نفسي
ما بهمني الناس، بتهمني نفسي انا كنت وين واس وين
بحب اعلم الناس زي ما اتعلمت.
🔳ودائما كلامي و ونستي في القراية وخاصة الطب
ولو في زول بعرفني اكيد بأكد على كلامي
🔳كان نفسي أكون إنسان قدوة واي زول يستفيد مني
والله العظيم كنت بتعلم اي معلومة ومنتظر الواطة تصبح
علشان امش اقولها لي اصحابي واشرحها ليهم.
الحمدلله الذي وفقنا لهذا
🔳كل ما تعلمونه عن أحمد عدلان
انه كان من قرية صغيرة اسمها خلاوي ودالفادني
القرية دي مشهورة ومعروفة في كل السودان
بس انا لي الشرف انو يذكروا اسمي من ضمن الناس الانجبتهم وكان لهم قيمة وأثر في المجتمع.
🔳بيحكي لي واحد من طلابي إنه ذكروا اسم ودالفادني في ونسة طوالي قالوا دي بلد دكتور أحمد عدلان
و واحد من الطلاب ماشي الجامعة جاء بي شارع الخرطوم مدني وقت وصل لافته خلاوي ودالفادني صورها ورسلها لي في الواتس
🔳كل الحاجات دي فخر بالنسبة لي وسعادة كبيرة
واعظم سعادة ربنا وفقنا لها ما إنه نجحت لا أبدا
أعظم توفيق إنه درست وساعدت الآلاف الطلاب والأطباء في السودان وخارجه
وبإذن الله مستمرين في تقديم وتسهيل العلم لكل إنسان
🔳وفي الختام :
يارب اجزي عني امي وابوي كل خير وجازيهم الجنة على ما قدموه لنا
مهما كتبت ما بوفي حقكم يا امي وابوي
د. أحمد مصطفى عدلان
