♨️مقال
📌 د ياسر محجوب يكتب: يا ناس السكري.. في رمضان شيلو الفاتحة
✍️ د. ياسر محجوب
◼️واحد اخونا عنده سكري وفاطر في رمضان …
زي الساعة عشرة جاتو رجفة وهو في السوق والمطاعم طبعا مقفلة وهو خجلان لانه صحته سمحة ماشاءالله..
قال يتخارج علي دكاكين الأحياء الجنب السوق …
المهم لقي ليهو شفع قاعدين في لستك سألهم من دكان ببيع فول والا اكل …
قالوا ليهو ياعمك في (بيت بكاء) بجاي…
◼️طبعا بيوت البكاء مصطلح للبيوت البتبيع اكل في رمضان
◼️وهو ماعارف المصطلح دا….
المهم مشي لقي ليك الصيوان مدقوق في نص الحوش والناس فايرة هههه ناس تغسل في جرجير وناس تقطع في بصل وواحدين بيدقوا شطة والدخان قاجي وفي مرأة سميييينة متحكرة في (بنبر) والحلل قدامها والبنات يشيلن في الصواني والشاي شغال …
وقف قدامها قالت ليهو ( تاكل شنو؟)
استغرب …لكن حسب جوعة السكري عاين في الحلل وطلب النفس دخلت في…
المهم ضرب تمااااام ومشي غسل يديه والباب جاك زول
وفجأة سمع الصيوان كله بكورك ليهو (يازول ..ياخينا…ياولدنا ياااا ابو الشباب)
اتلفت مخلوع ..قالوا ليهو المرأة دي قالت ليك تعال ..
مشي يتلبد …المرأة عيونا كبااار وهي سمييينة وماسكة الكمشة قال ليها نعم؟
قالت ليهو نعم الله عليك …الحساب..
قال ليها حساب شنو؟ …
حساب الاكل!!
قال ليها انا والله المعلومة الوصلتنى قالوا لي دا بيت بكاء
◼️ قالت ليهو قووووول دا بيت بكاء وعنقريبنا متكول في الحيطة بره …انت هسي عزيت منو؟ وشلت فاتحة مع منو؟؟
ناس السكري ما تنسوا تشيلوا الفاتحة😅
