📌 الصيدلانية دكتورة سماح مصطفى تكتب : لو استخدمنا دواء مدة تاريخ صلاحيتو انتهت حايحصل شنو؟ وماهي الحادثة الشهيرة للجيش الأمريكي لمن طلب رأي هيئة الغذاء والدواء FDA الأمريكية في أدوية منتهية الصلاحية موجودة في مخازن الجيش؟

جالينوس الطبي الصحة من لدن خبير 

📌 الصيدلانية دكتورة سماح مصطفى تكتب : لو استخدمنا دواء مدة تاريخ صلاحيتو انتهت حايحصل شنو؟ وماهي الحادثة الشهيرة للجيش الأمريكي لمن طلب رأي هيئة الغذاء والدواء FDA الأمريكية في أدوية منتهية الصلاحية موجودة في مخازن الجيش؟

✍️ طبيب صيدلاني دكتورة سماح مصطفى 

🟢الدواء بعد انتهاء فترة صلاحيته .. بعمل شنو؟🤔بتلقى زول يقول ليك:.. «الحبة دي صلاحيتها انتهت قبل شهر، لكن شكلها تمام .. عادي أبلعها؟».. الموضوع ما بس شكل الحبة ..و ما أي حبة انتهت صلاحيتها قابلة للاستخدام حتى لو شكلها ما اتغير.

📌 تاريخ الانتهاء (EXP) هو التاريخ البتكون الشركة ضامنة فيه إنو الدواء، لو اتخزّن بالطريقة الصحيحة، ح يكون لسه محافظ على قوته وجودته ونقاوته وثباته بالمواصفات المطلوبة.. بعد التاريخ دا، ما معناهو إنو الدواء فجأة الساعة 12 بالليل بقى سام

👈لكن المشكلة إنو بقى ما عندنا ضمان علمي إنو لسه محافظ على نفس الجودة والفعالية والأمان.

🔸طيب شنو البتغير🤔؟. مع الزمن، المادة الفعالة ممكن تبدا تتحلل كيميائياً.. وده ممكن يؤدي إلى:

⛔انخفاض كمية المادة الفعالة وبالتالي الدواء يبقى أضعف وما يدي التأثير المطلوب.

⛔تكوُّن نواتج تحلل (degradation products) داخل الدواء، وبعضها ممكن يكون غير مرغوب فيها أو ضارة.

⛔تغيّرات فيزيائية في الدواء؛ زي تغيّر اللون، الرائحة، القوام أو الذوبان.

⛔وفي المستحضرات السائلة أو بعض المستحضرات متعددة الاستخدام، ممكن يزيد خطر التلوث الميكروبي.

🔸ليه في أدوية بتتغير حالتها مع مرور الزمن🤔؟

لأنو الدواء ما عبارة عن المادة الفعالة بس؛ عندنا مواد غير فعالة Excipients، مواد حافظة، مذيبات، مثبتات .. وكلها بتتأثر بالحرارة والرطوبة والضوء والزمن.

🔳عشان كدا ممكن نشوف تغيّرات زي:

• سائل يحصل ليه ترسب أو تعكّر.

• كريم يتغير قوامو أو ينفصل.

• أقراص تتفتت أو يتغير لونها.

• بعض المستحضرات تتغير لزوجتها أو تتحول لقوام أقرب للجل.. لكن ⚠️ ما كل دواء اتغير شكلو معناهو بقى سام، وما كل دواء شكلو طبيعي معناهو آمن.. ودي نقطة مهمة جداً.

👈بس ضروري نلتزم بعدم تناول الدواء بعد تاريخ الانتهاء، وحتى لو حصلت تغييرات للدواء قبل تاريخ الانتهاء ضروري نتوقف عن تناولها ونستشير الصيدلي.

🔸الأدوية السائلة المحضّرة بالموية عندها قصة تانية؛ بعض المضادات الحيوية المعلّقة بعد إعادة تحضيرها بالماء عندها مدة استخدام أقصر بكثير من تاريخ انتهاء العبوة الأصلي.

👁️ قطرات العين: ممكن تكون العبوة نفسها ما انتهت، لكن بعد فتحها مدة صلاحيتها بتقصر وبكون عندها In-use expiry محددة حسب المنتج؛ لأنو الموضوع هنا ما بس ثبات المادة الفعالة، لكن كمان خطر التلوث الميكروبي.

🔸وبرضو التخزين بيفرق شديد: دواء محفوظ في مكان بارد وجاف ومناسب ما زي نفس الدواء القعد في عربية حارة أو غرفة ملانة رطوبة.. الحرارة، الرطوبة والضوء ممكن يسرّعوا تحلل بعض الأدوية، وحتى قبل تاريخ الانتهاء.🔸طيب سؤال أخير مهم .. ليه بنسمع أحياناً إنو في أدوية ممكن تستخدم بعد تاريخ الانتهاء؟🤔

🔳في حالات معينة، الجهات التنظيمية الدوائية زي الـ FDA في أمريكا، EMA في أوروبا، المجلس القومي للأدوية والسموم في السودان ..الخ

🔳الجهات دي ممكن تمدّد صلاحية بعض الأدوية المخزنة في مخزونات حكومية (بعد إجراء اختبارات ثبات وفعالية عليها).

🔳وفي أمثلة حصلت قبل كدا، الجيش الأمريكي طلب رأي هيئة الغذاء والدواء FDA في إمكانية استخدام أدوية تاريخ صلاحيتها انتهت موجودة في مخازن الجيش .. فطلع تقرير من الـ FDA بإمكانية استخدام جزء من الأدوية دي لعلاج منتسبي الجيش بعد اجراء اختبارات ثبات وفعالية عليها … ✓ فبالتالي الأدوية المنتهية الصلاحية ما بنقدر نستخدمها .. ما لم تسمح بذلك الجهات التنظيمية الدوائية بعد اجراء الاختبارات عليها.

🔳التمديد بيكون لمنتجات محددة وتحت ظروف تخزين محددة وبعد اختبارات علمية، وما بنقدر نعمموا على الأدوية الموجودة في البيت؛ لأنو ظروف تخزينها مختلفة وما عندنا نتائج اختبارات عليها.

💡 الخلاصة: تاريخ الانتهاء ما مكتوبة في العلبة للزينة💊.. ولو الدواء تاريخو انتهى، الأفضل ما نعتمد على إنو “شكلو لسه كويس”، بل نتخلص منو بطريقة آمنة ونجيب بديل صالح للاستخدام.. ✍🏾طبيب صيدلي/ Samah Mustafa