♨️ تثقيف صحي عام 

📌سيناريوهات طبية //استشاري طب الأطفال د. محمد عوض الكريم الإدريسي يكتب : سيناريو (قطيعة ونميمة داخل الأرحام.. حيقولوا ده من التسنين) 

✍️د. محمد عوض الكريم الإدريسي 

🔳وفي عيادة النساء والتوليد همس جنين فاطمة لجنين عائشة التي تجلس بجوارها في انتظار دورها لمقابلة اسشاري النساء والتوليد قائلا: هييي كيفك تعال نتونس ياخ المامات ديل طاقات الحنك و نص حنكهم قطيعة فينا و النص الباقي في البت البتسجل للدكتور 

🔳طفل عائشة: آي والله الامهات ديل قطاعات جنس قطيعة وكمان امي دي يوم في قعدة جبنة قالت لخالاتي القطيعة دي عنكوليب الونسة 

طفل فاطمة : كدي خلينا في حالنا وما نتملي ذنوب ساي وماشي علينا شيتا كتير ، قاليك الولادة دي موت عديل واحتمال تنقص اكسجين و احتمال تتشرق واحتمال تتملخ وتنشل يدك كمان 😔

🔳طفل عائشة: عارف انا كمان امي عندها ضغط والدكتور مرات بقوليها احتمال المشيمة تنفصل او يجيك ابكلبشي وندخلك عملية طارئة ، امي قالت ليه والجنين حيكون ناقص وحياته تتعرض لخطر ،اتخيل الدكتور الثقيل ده قاليها نحن بتهمنا سلامة الام اولا في اللحظة ديك عبيت ليه شلوت وشت لكن جات في بطن امي لما صرخت😄

طفل فاطمة: ياخ انا ده كله ما خايف منه ولا شايل ليه هم زي المعيليمة ديك 😔😔😔😔

🔳طفل عائشة: المعيليمة دي شنو كمان ما تكون قاصد قطعة الحبل السري ياخ انا شايل ليها هم 

🔳طفل فاطمة: المعيليمة دي الفترة العمرية ما بين ٥ شهور لحدي ٥ سنة 😔

🔳طفل عائشة: دي فترة حلوة مالها كمان؟ 🤔

🔳طفل فاطمة: انت فاكر نفسك حتتولد في اليابان انت حتتولد في الدوسان يا مان ، سمعت ليك الاطفال الصغار بيتونسوا مع اخواني قالوا دي فترة خطيرة ممكن اي مرض يفتك بيك قدام عيون والديك 

طفل عائشة: كيفن يعني وهم مالهم 🙄🙄

🔳طفل فاطمة: شوف يا صاحبي امي ذاعوها حنمشي لكن

 🔳المختصر المفيد لحدي ما نتلاقى تاني الفترة دي اي مرض يصييك حيقولوا ده من التسنين و يخلوك تواجه مصيرك المحتوم وانت وشطارتك اقصد مناعتك . ومناعتك حتواجه الامراض وخرمجات الاهل شي فصيد بالموس و كي بالنار و تش هايفات وقطع ريشة و دخان و عيك شيتا كتر ، الله يجعل ولادتنا في الدوسان ده كفارة لذنوبنا لو عندنا ذنوب😔

✍️أبومصعب