♨️ تثقيف صحي 

📌 نصرالدين حامد يكتب : أخدت حبوب الملاريا (الكوارتم) والملاريا ما طلعت اعمل شنو؟ 

✍️ نصرالدين حامد 

🔸واحد بيقول:

 أنا كملت حبوب (الكوارتم) وبعد أسبوع الملاريا رجعت تاني!

📢بنقول ليه: 

الملاريا ما بترجع خلال أسبوع من العلاج، الحصل معاك إنو الملاريا ما طلعت من جسمك أصلًا.

📢 ودا معناهو واحد من تلاتة:

1- ما أخدت الحبوب بالطريقة الصحيحة.

2- الحبوب الأخدتها جودتها سيئة.

3- أو الحبوب فشلت في إنها تعالجك.

🔳تواجد الميكروب في دم المريض خلال أقل من 4 أسابيع من الإصابة الأولى بيعني إنو الملاريا ما طلعت.

–وهنا بيتم أولًا التأكد من إنو: 

✅الحبوب الأخدها المريض جودتها كويسة (ابتعد عن الأدوية المهرَّبة)

✅جرعات الخط العلاجي الأول (الكوارتم) كانت سليمة وكاملة العدد والتراكيز، وتم تناولها في أوقاتها الصحيحة. 

✅ما حصل استفراغ لجرعة أو بعض الجرعات.

وبعداك ممكن الإنتقال للخط العلاجي الثاني. 

👈تنويه: 

تواجد الميكروب #بعد مرور 4 أسابيع من الإصابة الأولى والعلاج؛ بيعني إنو المريض اتصاب تاني بالملاريا، وهنا بيتم علاجو مرة اخرى بالخط الأول (الكوارتم). 

Recurrence of fever and parasitemia more than 4

weeks after treatment should be considered new

infections and treated with first-line treatment.

👈تنويه تاني: 

في علاجات ممكن الصيدلي يصرفها بدون روشتة، بناءً على حالتك الصحية وتسمى علميًا (OTC)، لكن ما من ضمنها علاجات الملاريا.

🔳الكوارتم وجميع علاجات الملاريا تتصرف فقط بوصفة طبية (روشتة)، ما تمشي الصيدلية طوالي وتقول ليهم أدوني حبوب الملاريا، لازم تمشي تفحص أول، أعراض الملاريا بتتشابه مع أعراض أمراض تانية كتيرة، فما صح تقرر إصابتك بالملاريا بمجرد وجود الأعراض ..

#الفحص_أولًا والدواء ثانيًا.

🔸تنويه أخير: 

️لازم نهتم بالتدابير الوقائية البتمنع إصابتنا بمرض الملاريا، ودا بإنو نكافح أماكن توالد البعوض، رش أماكن توالد البعوض بالمبيدات، وإستخدام الناموسيات المشبعة أثناء النوم.