♨️أسأل عن دوائك
📢 الحقني يادكتور.. الفلاجيل سممني
✍️ د. أحمد عدلان
( الحقني يا دكتور، بطني دي تعباني ليها زمن، وكل مرة الدكتور يديني مضاد حيوي “فلاجيل” عشان عندي مغص ما داير يروح. في الأول كنت كويس، لكن لي كم أسبوع كدا بحس بحاجة غريبة… أصابعي وأطراف كرعيني دايماً منمّلة وفيها زي الشكشكة، كأنها إبر قاعدة تنغز فيني)
يلا كلامه دا خلاني أركز معاهو شديد. سألته: “بتحس بضعف في أطرافك أو إنك ما متوازن في مشيتك؟”
رد عليّ وهو محتار: “أي والله فعلا! مرات بحس كرعيني ما شايلاني، وبقيت أمشي وأنا بترنّح.”
هنا الصورة بدت توضح. الميترونيدازول، أو الـ”فلاجيل” زي ما بنعرفه كلنا، هو مضاد حيوي مهم بنستخدمه كتير لعدوى البطن والأسنان والتهابات تانية. ومع إنه في الغالب آمن، لكن عنده جانب تاني خطير لو ما انتبهنا ليه.
بيعمل اعتلال عصبي (Peripheral Neuropathy) يعني الأعصاب الطرفية في اليدين والرجلين بتكون اتضررت.
طيب، الفلاجيل دخلو شنو في القصة دي؟
ببساطة الفلاجيل عنده حد بيبقى بعده سام (Metronidazole-induced neurotoxicity) ودي واحدة من آثاره الجانبية النادرة لكنها مهمة. الأبحاث والدراسات أثبتت إنها بتحصل غالبًا مع الاستخدام الطويل للدواء أو بجرعات عالية.
في دراسة منشورة في مجلة (Journal of Neurology, Neurosurgery & Psychiatry) أشارت إلى أن الاعتلال العصبي هو أكثر المضاعفات العصبية شيوعًا للميترونيدازول، وغالبًا ما يكون مرتبطًا بالجرعات التراكمية العالية والاستخدام طويل الأمد.
العلماء لسة ما متفقين 100% على الطريقة البتخلي الدواء دا يضر الأعصاب، لكن في نظريات بتقول إن الدواء نفسه أو نواتج الأيض والاستقلاب بتاعته بتتراكم في الأنسجة العصبية وبتسبب ليها تلف مباشر.
كمان في بحث في مجلة (Clinical Neuropharmacology) أوضح أن الآلية قد تكون عبر الإجهاد التأكسدي (oxidative stress) الذي يؤدي إلى موت الخلايا العصبية.
طيب، نعمل شنو عشان نعالج الحالة دي؟
أول وأهم خطوة كانت نوقّف الفلاجيل فورًا . دا هو أساس العلاج. في أغلب الحالات، مجرد ما المريض يوقف الدواء، الأعراض بتبدأ تتحسن بالتدريج.
في تقارير حالات كثيرة، منها تقرير في (American Journal of Kidney Diseases)، أكدت أن الأعراض العصبية غالبًا ما ترجع طبيعية (reversible) بعد إيقاف الدواء.
القصة دي ما عشان نخوّفكم من الفلاجيل، لكن عشان نكون واعيين وحذرين. أي دواء، مهما كان بسيط في نظرنا، هو سيف ذو حدين.
نصيحتي لأي زول بياخد الفلاجيل أو أي دواء لفترة طويلة:
1. ما تاخد دواء من راسك: لازم أي مضاد حيوي يكون تحت إشراف طبيب.
2. تمش تقابل لو شعرت بأي عرض جديد: لو حسيت بتنميل، ضعف، أو عدم توازن، طوالي ارجع للدكتور.
3. التزم بالجرعة والمدة: ما تكرر الدواء أو تزيد مدته براك.
في النهاية، الشفاء بيبدأ بالمعرفة.
