♨️ أسأل عن دوائك

📌 د. ماجد المبشر يكتب : يا أمهات اتقوا شر ( الكافلجين)

✍️ د. ماجد المبشر

◼️ سوداني و خليك سوداني 

بندولنا و كفلجينا في الدكان و لُباناا في الصيدليه. 

كافلجين_للأطفال؟ اقيف هـنــا‼️

السلام عليكم يا ناسنا الطيبين 🧡

◼️اليوم داير أفتح معاكم موضوع خطير جداً وبنشوفو يومياً في البيوت، وهو: استخدام الأسبرين (الكافلجين) للأطفال!

✋ شنو الكافلجين ده؟

“الكافلجين” أو الأسبرين دواء معروف ومتوفر في أي مكان، وغالباً الأمهات بيستعملوه للأطفال لو عندهم سخانة أو صداع.

لكن الحقيقة إنو الموضوع دا خطيييير وما بسيط… ووراه مشكلة كبيرة!

⚠️ ليه ممنوع في الأطفال؟

الأسبرين ممنوع نهائياً للأطفال أقل من 18 سنة (خاصة تحت 12 سنة)، لأنو ممكن يسبب مرض نادر وخطير اسمو:

🔴 متلازمة راي (Reye’s Syndrome)

ودي من أخطر المضاعفات الممكن تحصل للطفل بعد ما ياخد الأسبرين، خصوصاً لو كان عندو مرض فيروسي زي:

• الجدري المائي (Chickenpox)

• الإنفلونزا

• الزكام

🎯 أعراض متلازمة راي:

• ترجيع مستمر

• نعاس شديد أو فقدان الوعي

• تغير في السلوك (عصبية، دوخة)

• تورم في الدماغ والكبد

• نوبات وتشنجات

• وفي بعض الحالات، الوفاة لا قدر الله

🧠 مثال واقعي:

طفل عمره 5 سنين جاتو سخانة بعد زكام بسيط. الأم أدتو كافلجين لأنه ما لقت بندول في البيت. بعد ساعات بدأ يترجّع وبقى نعسان بشكل خطير.

لما وصل المستشفى، كان حصل تورم في الدماغ واتضح إن السبب الأسبرين.

يعني حبة صغيرة ممكن تنقلب كارثة كبيرة!

💊 طيب ندي شنو بدل الكافلجين؟

✅ الأدوية الآمنة والمجربة للأطفال هي:

 • البندول (باراسيتامول)

 • أيبوبروفين (لكن بحذر وتحت إشراف طبي)

ديل آمنين، متوفرين، وما بيسببوا متلازمة راي.

🗣️ دورنا شنو؟

• كأطباء وصيادلة: ننبه الأهالي ونوعيهم.

• كأمهات وآباء: نعرف إنو ما كل دواء يصلح للأطفال.

• ننشر التوعية في القروبات، البيوت، الجيران، الحِلَق.

✅ الخلاصة:

👶 الطفل أمانة… وما بنعالج السخانة بحاجة ممكن تسبب كارثة!

🚫 الكافلجين للبالغين فقط (مرضى قلب، كبار سن)

💊 للأطفال: استخدم البندول أو أيبوبروفين.